Aktibong kaso sa siyudad wala na kaabot sa 600

CEBU, Philippines — Padayon nga miubos ang aktibong kaso sa Covid-19 sa Siyudad sa Sugbo ug base sa uwahing talaan nga gipagawas sa Department of Health Central Visayas naa nalang kini sa 558 ka mga kaso.

Ang siyudad aduna karoy kinatibuk-ang natala nga 23,854 ka mga kaso sukad sa pagsugod sa pandemiya sa miaging tuig human dunay napuno nga 23 ka bag-ong kaso.

Bisan pa niini, mas daghan gihapon ang nangaayo na nga 34 ka buok samtang nagpabiling 859 ang natala nga nakalas.

Samtang ang Mandaue City nakatala og walo ka bag-ong kaso, ang siyudad karon duna nay 6,487 ka total cases apan 241 lang ang aktibong kaso.

Pito sab ang nadugang sa mga nangaayo ug nagpabilin sa 218 ang talaan sa mga namatay.

Ang Lapu-Lapu City duna sab 6,319 total cases sa COVID-19 apan 355 lang maoy aktibo niini karon ug nagpabiling 166 ang gidaghanon sa namatay.

Sa datos sa DOH-7, ang Central Visayas dunay 58,501 total cases sa COVID-19; 3,494 ang active cases; 52,968 ang recoveries ug 2,039 ang deaths.

Sa laing bahin, ang Dakbayan sa Lapu-Lapu gikatakdang makadawat og 1,000 Pfizer nga bakuna batok sa Covid-19 sumala pa ni Mae Cheryll Tepait, ang immunization coordinator  sa Lapu-Lapu City Health Department (LCHD) .

Matud  pa niya nga kini maoy unang higayon nga ang dakbayan mopahigayon sa pagbakuna gamit ang maong brand sa bakuna.

Si Tepait miingon nga ning higayona sa mga hospital nila buhaton ang pagpamakuna aron nga makaaksyon dayon kun dunay mga dili maayong side-effects ang mabakunahan niini.

Nasayran nga dunagy mga negatibong nanggawas nga mga balita kabahin sa Pfizer vaccine nga gigamit didto sa Uropa ug Africa apan napamatud-an nga isolated cases lang kadto ug mas daghan ang positibong kaayohan nga nahatag niini.

“Vaccination post ana, most likely sa mga facility-based, like sa mga hospitals, like ARC (Hospital) and Mactan Doctor’s (Hospital),” nagkanayon si Tepait.

Ang makadawat sa Pfizer mao kadtong mga A2 ug A3 priority groups nga gilangkoban sa mga senior citizens ug persons with comorbidities.

“Unya na pre-registered na sab ang atong i-prioritize ana. So naa naman ta’y mga na pre-registered nga seniors, adto sad ta nila mokuha. And they will be informed ug amo silang tawagan. Kung motando sila, then they’ll go for that,” dugang pa niyang pamahayag.

Sa laing kalamboan, gipaubos sa Humanitarian Disaster Preparedness and Response training ang mga Barangay Health Worker (BHW) sa  Dakbayan

sa Mandaue niadtong miaging adlaw aron sila makatabang unya sa pagpamakuna sa siyudad.

Ang maong kalihokan gipasiugdahan sa Ramon Aboitiz Foundation Incorporated  sa  tuyo  nga kahatagan  sila og igong kasayuran labot sa kamahinungdan gayod sa pagpabakuna batok Covid-19.

Ang mga BHW maoy motabang sa information drive bahin sa pagpamakuna ug sa kamahinungdanon niini sa tawo.

Ang Vaccine Board sa dakbayan padayong nangumbinsir sa mga tawo nga magpabakuna gyud ug pagtuman sa minimum health protocol aron paglikay nga matakdan sa maong sakit. –/IBM (BANAT NEWS)