29,000 doses sa Pfizer vaccine naabot sa Central Visayas
CEBU, Philippines — Nagtagbo kagahapon ang Vaccine Advisory Board kinsa si Cebu City Vice Mayor Michael Rama ang lead convener ug gituki ang angayan nilang buhaton ugaling mahatagan og doses sa Pfizer-BionTech COVID-19 vaccine.
Nasayran nga niadtong Martes 29,000 doses sa Pfizer ang niaobot sa Central Visayas diin dali kining gidala ngadto sa storage facility sa Department of Health-7. Ang Pfizer-BioNTech COVID-19 vaccine kinahanglan i-store sa pasilidad nga adunay -70 degree celsius temperature.
Si Dr. Jeffrey Ibones, pangulo sa Cebu City Health Department ug miyembro sa Vaccine Advisory Board nagkanayon nga ang kagamhanan sa siyudad walay storage facility aron adto ibutang ang nahisgutang bakuna.
Hinuon ang siyudad adunay gitagana nga pundo ug mahimo kining mangita og pasilidad alang sa maong katuyoan. Si Ibones nagkanayon nga nakadawat siya og report gikan sa DOH-7 nga hatagan ang kagamhanan sa siyudad og 20,000 doses sa AstraZeneca.
Sa maong gidaghanon 10,000 niini gamiton alang sa second dose sa mga tawo nga nakadawat sa first dose sa AstraZeneca samtang ang nahibilin nga 10,000 doses gamiton isip first dose.
Ang siyudad padayon sa paghatag sa second dose sa Sinovac vaccine ug temporaryo nga gihunong ang vaccination sa senior citizens tungod kay wala pay bakuna nga naabot sa siyudad.
Sa laing bahin, gamiton na ang AstraZeneca nga bakuna sa umaabot nga mga adlaw sa Siyudad sa Talisay. Nasayran nga gitiwas nalang ang pagbakuna sa ikaduha nga dose alang sa health workers.
Si Dr. Lino Alanzado, pangulo sa City Health Office nagkanayon nga kapin sa 100 ka health workers ang nakakompleto na sa pagbakuna.
Ug gilaoman nga sa mosunod nga adlaw o sunod semana AstraZeneca na ang ilang gamiton sa pagbakuna. Si Mayor Gerald Anthony “Samsam” Gullas Jr. nibutyag nga 1,500 ang iyang gipangayo ug gitubag usab kini.
Sa pagpadayon sa pagbakuna estrikto nga ipasunod ang schedule sa matag barangay.
Ang senior citizens sa Brangay Dumlog maoy mag-una sa pagbalik unya sa pagbakuna. —Gabriel C. Bonjoc/BDB (BANATNEWS)
- Latest
