Firetruck sa Basak San Nicolas naguba-Kapitan

CEBU, Philippines — Nag-inusarang fire truck sa Basak San Nicolas sa Cebu City nga naigo og tulo ka sunog sa nakalabay’ng duha ka adlaw naguba matud pa sa ilang barangay kapitan nga si Norman Navarro.

Tungod niini, gipakigkitaan niya ang iyang mga fire volunteers aron palapdan ang pagpahimangnoan nga magmatngon ang mga molupyo batok sa sunog tungod kay lisod nang mausban ang sunog.

Kahinumdoman nga niadtong adlaw nga Domingo, duha ka sunog ang niigo sa ilang barangay. Unang naigo sa sunog ang Sitio Caimito gisundan sa Sitio Seaside Alumnos ug niadtong Lunes sa gabii sa Sitio Side Rubberworld.

Samot ang kabalaka ni Navarro tungod kay guba ang ilang kaugalingong nag-inusarang fire truck karon ug wala na gani makaresponde sa Rubberworld. 

Sumala pa niya importante kaayong duna dayoy moabot nga firetruck sa pagsugod palang aron di makatabok og laing balay ang sunog.

Napamatud-an na nila kini tungod kay makadaghang higayon na silang nakapakgang sa mas dakong sunog tungod paspas nilang pagresponde dayon sa balay diin nagsugod ang sunog.

Niadtong adlaw nga Lunes nahatagan na og pasiunang tabang mga mga nasunogan sa Sitio Seaside sama sa gamit sa kusina sama sa planggana, sabon, tuwalya ug uban pa.

Nakadeklarar na og state of calamity ang barangay ug plano nilang mohatag karong semanaha og financial aid nga P2,000 ug 25 kilos nga bugas kada pamilya.

Nanawagan siya karon sa mga konstituwente nga magmatngon aron malikayan ang sunog.

Sa pikas bahin, giawhag sa  Konseho ang Metropolitan Cebu Water District (MCWD) nga mogahin og libreng supply sa tubig ang mga maapektohan kun dunay mahitabong sunog sa siyudad. Giawhag ang MCWD nga mobutang og gripo sa mga evacuation centers aron igo gyud ang supply sa tubig sa mga biktima sa sunog, tipik sa resolusyong giduso ni Konsehal Nestor Archival.

Matud niya importante kaayo ang tubig sa mga evacuation centers sama sa mga sports center, mga eskwelahan , o gymnasium nga maoy pirmeng pasilongan sa mga biktima sa sunog.

“Water is a basic necessity especially for those displaced victims and the water supply in the evacuation centers would not be sufficient to support the needs of these victims,” matud pa ni  Archival.— Rowena Capistrano, Decemay P. Padilla/IBM (BANATNEWS)