Sputnik hayan gamiton pagbakuna sa mga seniors
CEBU, Philippines — Gipahibalo ni Cebu City Mayor Edgardo Labella nga ang sunod nga bakunang ihatag para sa mga senior citizens sa siyudad mao ang Sputnik gikan sa Russia, base kini sa panagestorya nilang duha ni Secretary Carlito Galvez Jr. ang gitudlong vaccine czar sa nasud.
Si Labella miingon nga kadtong mga seniors nga wala pa mabakunahi tungod nahurot na ang mga bakuna dili angay maguol tungod kay duna pay maabot nga laing bakuna.
Ang vaccination rollout sa siyudad alang sa mga seniors nahunong sugod niadtong nakalabay nga adlaw tungod nahurot na ang Sinovac vaccine nga gihatag sa DOH-7. Matud pa ni Labella, gawas sa Sputnik, nakahisgot pud si Galvez ug uban pa nga mga brand apan nag-agad ra gyud kini kun unsay available.
Gipasalig sab sa mayor nga duna nay budget ang siyudad aron maoy mopalit sa mga bakuna apan gamiton lang kini kun dili na makahatag og bakuna ang nasudnong kagamhanan.
Si Dr. Jeffrey Ibones, pangulo sa Cebu City Health Department miingon nga gipasaligan sila sa DOH-7 nga karong semanaha mahatag balik og bakuna ang siyudad.
Base sa data sa CCHD dunay 26 mil ka mga senior citizens ang nagparehistro apan naa lang sa 13,000 lang ang gustong mabakunahan samtang ang uban wala pa nakadesider ug naa gyuy uban nga dili magpabakuna.
Subling giawhag ni Ibones ang mga senior citizens nga magparehistro lang gihapon bisan unsa pa ilang desisyon aron maihap kun pila gyud ka buok ang nagparehistro.– Decemay P. Padilla /IBM (BANATNEWS)
- Latest
