Kapitolyo mogahin og dugang P100 milyones sa Sugbo Negosyo
CEBU, Philippines — Mogahin ang kapitolyo og laing P100 million nga pondo alang sa ika duhang round sa Sugbo Negosyo program.
Si Cebu Governor Gwendolyn Garcia nipahibawo niini atol sa iyang facebook live niadtong Marso 25 alang sa mga Sugboanon nga gusto mosugod og negosyo human naapektohan sa pandemya sa COVID-19.
“We are already planning for the next round. Another hundred million will be poured, atong ibubo sa ekonomiya sa Probinsya sa Sugbo,” matod ni Garcia.
“Daghan kaayong nangutana kanus-a ang next round. Tentatively we might start by July. We will soon give you more definite dates,” dugang sa gobernador.
Ang unang round sa Sugbo Negosyo program hapit na mahuman. Matud ni Garcia nga uban sa Sugbo Negosyo core group nitotok sila sa pag accredit sa mga legitimate, reputable ug credible suppliers o merchants alang sa maong programa.
Ang Sustainable Upliftment and Growth through Business Opportunities kun Sugbo Negosyo usa ka economic assistance program sa Probinsya sa Sugbo nga mohatag og pundo sa mga gagmay nga negosyo nga naapektohan sa pandemya sa COVID-19. —MEL (BANATNEWS)
- Latest
