Migradwar sa rehab sa cosap nakadawat og 3k

CEBU, Philippines — Gipanghatagan og financial assistance sa kagamhanan sa Siyudad sa Sugbo ang persons deprived of liberty (PDLs) nga nigradwar sa out- patient drug rehab program sa Cebu City Office of Substance Abuse Prevention (COSAP).

Suma pa sa hepe sa COSAP nga si Jonah John Rodriguez nga kapin sa 60 ka PDLs ang nakadawat og P3, 000 matag usa nga daku na nga tabang ilabi na panahon sa pandemya.

Masaligon usab ang COSAP sa lapad nga kooperasyon sa mga opisyales sa barangay sa ilang mga programa.

Ang maong departamento mohimo gihapon og surpresang drug test sa mga empleyado sa City Hall ug barangay workers.

Samtang lima ka pusher og shabu nga naglakip sa usa babaye ang nasikop sa kapolisan atol sa buy bust operation sa mga sakop sa Provincial Intelligence Unit (PIU) sa Cebu Provincial Police Office  ug Drug Enforcement  Unit sa miaging gabii diha sa Sta. Lucia, Barangay Poblacion Oriental, Lungsod sa Consolacion

Si  Police Lieutenant Colonel Randy Korret, hepe sa PIU sa CPPO miila sa mga nadakpan nga sila si Jessie Cobarde Pastor, 38 anyos, ulitawo ,Ronald Mayol Cobarde, 37  anyos,  Francis Louie Ouano, 34 anyos , Michael Colina Tenebroso, 36 anyos,ug ang bugtong babaye nilang kauban nga si Elizabeth Daag, 27 anyos nga pulos taga Dakbayan sa Sugbo.

Nasayran nga ang duha nga manag-agaw nga sila si Jessie Cobarde Pastor ug Ronald Mayol Cobarde ang anaa na sa watchlist sa kapolisan.

Nasakmit gikan kanila ang pito ka gagmay nga pakete sa gituohang shabu ug laing upat ka medium size nga pakete nga nitimbang og lima ka gramo nga mikantidad og P34, 000.

Lakip usab sa nasakmit ang duha ka motorsiklo isip dugang ebidensiya sa kaso nga ipasaka batok sa lima ka mga dinakpan. —Sanden J. Anadia/ MEL (BANATNEWS)