Mga residente sa bukirang barangay nagtinabangay

CEBU, Philippines — Si Konsehal Philip Zafra sa Dakbayan sa Sugbo nibutyag nga nipatigbabaw ang “Bayanihan Spirit” diha sa mga bukirang barangay sa siyudad diin ang mga residente nagtinabangay sa pagsemento sa agianan sa tawo aron dili lisod ang pag-agi nila.

Sa facebook post ni Zafra gipakita niini ang pagtinabangay sa mga residente sa bukirang barangay aron mahimong hapsay ang agianan sa tawo.

Giingong ang gobiyerno ang nihatag og semento ug ang mga residente sa lugar nikugi dayon kini sa pagtrabaho sa ilang mga agianan diha sa Barangay BonbonProper.

Gihimo usab kini sa pipila ka agianan sa Barangay Cantipla, Tabunan ug uban pa.

Samtang sa mga dulhogon nga lugar nag-apod apod usab si Zafra og mga foot path.

Gawas sa pagtarong sa mga agianan  gihingosgan usab karon ang pagpasiga sa mga suga sa poste nga taud-taod na nga nanga-ponder.

“May labot kini sa atong programa sa pag -promote sa seguridad sa atong katawhan ug sa pagpahayag sa atong mga karsada gikan sa mga umahan sa dakbayan”, matud ni Zafra.

Si Zafra maoy chairman sa committee on peace and order sa konseho sa Siyudad sa Sugbo. BDB (BANATNEWS)