P37.7 milyones road project sa Mandue gihangop sa molupyo

Cebu, Philippines — Gihangop sa mga molupyo sa lugar ang kaugmaran sa P37.7 milyones nga road project nga modugtong sa A.C. Cortes Avenue ug G. Ouano Extension sa Barangay Ibabao Estancia sa Dakbayan sa Mandaue.

Matud sa Kapitan sa maong barangay Tinge Echavez nga ang kaugmaran sa nahisgutang dalan ang dugay na nga gipangandoy sa iyang amahan  nga si kanhi kapitan Romulo Echavez Sr.

Nasayran nga ang maong proyekto gikatakdang mahuman sulod sa lima ka buwan ug giingong dako kini og tabang kong ugaling adunay emerhensiya diin ang nahisgutang lugar nga usa ka sudlonon giisip nga fire prone area. Ang maong giugmad nga dalan lahos kini diha sa Sitio Papaya, Tarnate ug Tambis sa nahisgutang barangay.

Giingong ang maong karsada makatabang usab nga maloag ang trapiko sa kadalanan sa siyudad.

Sa laing bahin, mokabat sa P17 milyones nga kantidad sa infrastructure project ang gibubo sa Probinsya sa Sugbo ngadto sa 6th district.

Lakip niini ang pagkonkreto ug pagpaayo sa 437 meters Casili-Sacsac-Cabangahan road mga nikantidad og P6,279,475.11 ug si Gobernador Gwendolyn Garcia maoy nangulo sa groundbreaking niini.

Gipahigayon usab ang groundbreaking sa multi-purpose covered court sa Lanipga, usa sa mga bukirang barangay sa Lungsod sa  Consolacion diin gigahinan kini og P2,989,998.19 nga pundo.

Giinugurahan usab sa mga lokal nga opisyal ang Tayud-Semenario road section sa Barangay Tayud, Lungsod sa Consolacion diin nikantidad kini og P7,790,270.

Si Kongresista Emmarie “Lolypop” Ouano-Dizon lakip ang iyang igsuon nga si 6th  district Board Member Thadeo Jovito Ouano, Glenn Anthony Soco, Consolacion Mayor Joannes “Joyjoy” Alegado ug ubang opisyales sa Consolacion, Cordova ug Mandaue City ang nitambong sa maong kalihokan subay sa pagpahigayon sa Kapitolyo sa Caravan of Services niini  diha sa nagkadaiyang lungsod ug dakbayan sa probinsiya.  - Le Phyllis F. Antojado (BANAT NEWS)