Pribadong sakyanan, motorsiklo dili pasudlon sa Carbon

Cebu, Philippines — Sugod karong umaabot adlaw’ng Lunes dili na pasudlan og mga pribadong sakyanan ug motorsiklo ang Carbon Public Market pagpangandam sa nagsingabot nga Semana Santa.

Kini ang gibutyag sa direktor sa Cebu City Police Office Police Colonel Josefino Ligan.

Matud ni Ligan nga subay kini sa kamandoan ni Mayor Edgardo Labella sa pagpahapsay sa Carbon Public Market aron malikayan ang pagdasok sa mga tawo sama sa nilabay’ng tuig tungod sa sagol sa benignit.

Gibutyag usab ni Ligan nga nagkasinabot sila uban sa Carbon Market Administrator, kapolisan ug PROBE nga sugod sa Marso 22, 2021 hangtud sa Semana Santa wala nay pasudlon nga mga pribadong sakyanan ug motorsiklo.

Ang delivery trucks lang ang tugotang pasudlon aron mohatod sa mga baligyaon.

Matud ni Ligan nga  atol sa ilang gihimo nga ocular inspection niadtong Lunes ilang nakita nga samok ang trapiko sa maong lugar tungod sa pedestrian ug sakyanan.

Nasayran nga adunay mga rerouting sa sakyanan nga ipatuman diha sa Carbon Public Market lakip usab ang entry ug exit sa mga mosulod nga mamalitay sugod karong adlaw’ng Lunes.