3 mil ka violators nasikop sa Market Operations Division

CEBU, Philippines — Nikabat ngadto sa 3 mil ka tawo kinsa nakalapas sa health protocols ang nasikop sa Cebu City Market Operations Division (MOD) sulod sa duha ka buwan nila nga operasyon.

Ang mga nasiko nisulod kini diha sa mga merkado sa siyudad nga wala magsul-ob og face mask.

Si Irvin Cabales, market administrator nibutyag nga kada adlaw nga operasyon sa iyang mga sakop gikan sa kadlawon hangtud sa gabii makadakop kini og 50 ka tawo.

Nasayran nga bisan og nagsige na og pahinumdom ang MOD ngadto sa katawhan nga magsul-ob kanunay og facemask apan duna lang gihapoy mga tawo nga dili mosunod niini.

Matud ni Cabales nga daghang alibi ang mga tawo sama sa gius-os ang ilang mask kay niinom.

Gibutyag ni Cabales nga ang iyang mga sakop magkuha kini og video o hulagway hinungdan nga dili kalimod ang violator nga wala gyud niya gisul-ob ang iyang face mask.

“Ang uban pod diha makalimot nga wa diay sila’y dalang mask, ang uban sad to say naay gagmay’ng mga bata nga gipangdala”, ni Cabales pa.

Ang Pasil ug Carbon Public Market maoy daghan gihapon ang madakpan nga nakalapas sa health protocols.

Si Cabales nanawagan sa katawhan nga dili kalimtan ang pagsul-ob og face mask ug face shield kong moadto sa merkado tungod kay ang mga enforcer sa MOD nagkugi og panakop sa violators.

Ang mga madakpan makabayad kini og multa ug kadtong walay ikabayad mopahigayon kini og community service.

Tumong sa maong operasyon sa MOD aron mokunhod ang gidaghanon sa kaso sa COVID-19. BDB (BANATNEWS)