Gilugos sa ig-agaw

CEBU, Philippines — Usa ka 30-anyos nga lalaki ang gidakop sa mga membro sa Dalaguete Police Station tungod sa paglugos sa iyang ig-agaw nga usa ka 25-anyos nga single-mom, kaniadtong Domingo sa kaadlawon, Marso 8,2021.

Matod ni Police Senior Master Sergeant Jackilou Branzuela sa Dalaguete Police Station, ang biktima personal nga midangop sa ilang buhatan human krimen.

“Base sa iyang (victim) gi-report, kini siya nga suspect, hubog nga misulod sa iyang panimalay, unya ang iya rang kuyog didto sa iyang balay is iya rang bata na two-year-old,” matud ni Branzuela.

Dugang pa niya nga wala namatikdi sa biktima ang pagsulod sa suspetsado kay sa likod kini nga pultahan sa balay misulod diin guba ang siradora niini.

Nakurat ang biktima pagkakita sa suspek apan giingong nagpasumangil kini nga nangita kini sa iyang amigo diha sa balay. Ang biktima mibalibad nga wala didto ang gipangita niini kay sila rang duha sa iyang anak.

Matud pa nga dihadiha, gihaylo kini sa suspek nga bayran og P500 aron makighilawas kaniya.

“Ni refused siya since ig-agaw baya sila, minyo pa jud ang suspect. Mao ‘to nga iyang ig-agaw,tungod sa kahubog siguro gibira siya, nahibulong siya kay nagkarga baya siya sa iyang anak,”matud ni Branzuela.

Ang biktima miangkon nga wala siya mosinggit pagpangayo og tabang tungod nahadlok siya para sa niyang anak.

Pagkahuman sa krimen, ang suspek gikatahong mitawag pa sa amigo niini nga nagpaabot ra diay sa gawas aron pasudlon sab, apan giingon nga anang tungora nakamata na ang bata ug nihilak.

Ang suspek dalidali dayong nigawas samtang ang biktima nagdali sab sa paglakaw padung sa buhatan sa kapolisan ug gisumbong ang krimen nga miresulta sa pagkasikop sa suspek.

Ang suspetsado gitanggong na karon sa Dalaguete Police Station samtang giandam ang kasong ipasaka batok sa suspek.— IBM (BANATNEWS)