Kapin 20 angol; laing usa ang patay sa duha ka aksidente

CEBU, Philippines — Dili mominos sa 24 ka mga tawo lakip niini mga bata ang naangol human ang gisakyan nilang mini-dump truck nawad-an og brakes hinungdan nga nadasmag ug nalimbuwad diha sa Transcentral Highway sa Barangay Cansomoroy, Lungsod sa Balamban niadtong Domingo sa buntag.

Ang drayber sa Mitsubishi canter mao si Archie Dionson, 35, taga Barangay Pulangbato ning Dakbayan sa Sugbo.

Base sa inisyal nga imbestigasyon sa kapulisan sa Balamban paubos padulhog sa Balamban ang mini-dump truck apan sa pag-abot sa maong lugar mikagar ang brakes niini.

Swerte nalang nga dunay railings ang kilid sa karsada nga nakatabang kay wala dayon madiretso og kalahos sa pangpang ang trak maong nangalagpot ang kadaghanan sa mga sakay niini ayha pa nalimbuwad sa may pangpang.

Pulos nakaangkon og mga ginagmay nga bun-og, pangos, bukol ang kadaghanan sa mga pasahero gidala sa tambalanan sila si Lucio Leson ug Maritel Gabutan nga maoy nagrabehan.

Si Police Master Sergeant Alby Agua, Desk Officer sa Balamban Police Station miingon nga nagkasabot ang mga biktima u gang drayber nga dili lang mopasaka og kaso kay sila pulos ra managsilingan.

Sa laing bahin, usa ka motorista ang nakalas human nabangga sa gikasugat nga laing duha ka motorsiklo alas 10 pasado ang takna sa miaging gabii  sa Bag-ong Dalan, Barangay Yati sa Lungsod sa Liloan.

Si  Police Corporal Ian Lagnasan, imbestigador sa traffic section sa Liloan Police Station miila sa namatay nga mao si Jose Benjie Cardi, 45, taga Lungsod sa Consolacion nga usa ka taxi driver.

Naangol usab ang gikabanggaanay niini nga sila si Dan Jay Nietes,25, taga Barangay  Cabancalan sa Dakbayan sa  Mandaue ug Elmer Flores, 26, taga Barangay Ocaña  sa Siyudad sa Carcar.

Si Lagnasan miingon nga padulong sa siyudad sa Sugbo si Cardi  sa dihang pagabot sa maong lugar nitipas kini padung sa pikas lane ug napunggit ang gikasugat nga si Nietes ug sunod naigo si Flores.

Tungod sa kakusog sa panagbangga nangalandig sa tambalanan ang tulo apan nakabsan sa kinabuhi si Cardi. — Romeo T. Limpangog/IBM (BANATNEWS)