Death toll board
Cebu, Philippines — Sa pikas bahin, aron pahinumdoman ug pasidan-an nga kinahanglang mag-amping sa tanang oras ang mga motorista, nagbutang og “death toll board” sa ihap sa mga namatay ug nangaangol sa disgrasya sa kadalanan ang Barangay Gaas, sa lungsod sa Balamban.
Si Cyril Velasco nga usa ka rider ug negusyante nakahunahuna sa pagbutang niini aron pahimangnoan ang mga motorista nga mag-amping sa tanang oras kung magmaneho.
Si Police Major Michael Gingoyon, provincial chief sa HPG-7 mihangop ang lakang ni Velasco sanglit nagpakabana siya sa mga motorista.
Matud ni Kapitan William Genil 32 na ka tawo ang namatay ug 75 ang naangol sud sa usa ka dekada diha sa maong dapit.
Ang maong bahin sa Transcentral Highway nga nagkonektar sa Cebu City ug sa Balamban kakurabadahon kaayo ug lapad ang dalan maong matintal ang mga motorista magpaturatoy og padagan.
Bike Lanes
Sa sa kalabot nga balita, gipahibalo ni Jonathan Tumulak, traffic czar sa Siyudad sa Talisay nga mahimo ng gamiton sa mga magbisekleta ang bike lanes sa siyudad. Ang bike lanes gipintalan og kolor nga blue nga makita sa N. Bacalso ug lakip na unya ang Cebu South Coastal Road (CSCR).
Proyekto kini sa Department of Public Works and Higway (DPWH) apan ang Local Government Units (LGU) ang motan-aw kung gigamit ba gyud kini sa mga bikers.— Gabriel Bonjoc (BANAT NEWS)
- Latest
