Patay’ng lawas sa lalake napalgan sa Compostela

CEBU, Philippines — Giugkat sa mga sakop sa Scene of the Crime Operatives (SOCO) ang patay'ng lawas sa wala mailhing lalaki nga gituohang biktima sa salvage diha sa kasagbotan sa bukirang bahin sa Barangay Tag-ubi sa Lungsod sa Compostela .

Ang patay’ng lawas dunay samad pinusilan sa iyang mata ug giputos ug plastic ang baba ug mata niini ug walay sapot, gibana-bana nga nag-edad kini og 26 ngadto sa 30 anyos, pution ang pamanit og mga 5’6” ang gitas-on.

Si Police Executive Master Sergeant Joel Rosales sa Compostela Police Station miingon nga napalgan ang biktima alas 11 pasado sa buntag niadtong Domingo.

Usa ka Cristina Bataluna, 35 anyos ug Elvira Corag nga pulos nagpuyo sa maong dapit ang nakabantay sa patay'ng lawas sa usa ka tawo kinsa dali usab nga mipahibalo sa mga barangay opisyal sa nahisgutang lugar.

Dugang pa ni Rosales nga napalgan sa kapolisan sa crime scene  ang lima ka kabhang sa bala sa armas nga kalibre 9mm ug napalgan usab ang duha pa ka mga buhing bala  sa mao gihapong kalibre.

Si  Rosales miingon nga gitug-an sa pipila ka mga molupyo sa maong dapit nga nakadungog sila og mga boto sa armas niadtong Domingo sa kaadlawon apan wa nila panumbalinga.

Ang mga kabanay nga nagtinguha sa pag-ila sa maong patay'ng lawas  ang gi-awhag sa kapolisan sa pagbisita sa ilang buhatan alang sa pag-ila sa biktima nga naa karon gipahiluna sa Saint Francis Funeral Home sa dalan Natalio Bacalso sa Dakbayan sa Sugbo. —MEL (BANATNEWS)