Bag-ong infirmary clinic sa Barili gibuksan na

CEBU, Philippines — Bukas na karon ang bag-ong infirmary clinic didto sa lungsod sa Barili nga anaa sa kanhi motorpool area sulod sa municipal compound sa lungsod.

Ang maong pasilidad dunay 10 ka higdaanan ang kapasidad, aduna nay utlrasound ug x-ray machine ug gitan-aw nga mamahimo nga model clinic sa tersero distrito sa lalawigan sa Sugbo.

Sumala sa report sa Sugbo News, ang gidumala nga news portal sa Probinsya sa Sugbo, ang maong pasilidad adunay tulo ka available nga doktor ug tulo ka full-time nurse ug gipaabot nga mahimong i-accredit na sa Philippine Health Insurance PhilHealth.

“Matag tuig naningkamot ko nga magahinan gyud og pondo kaning maong infirmary. Mao kadto nga lagi dependent man ta sa DOH, hinay-hinay ni nga nahimo,” matod ni Cebu Governor Gwendolyn Garcia atol sa pagbukas sa maong infirmary niadtong Enero 18, 2021.

Si Barili Mayor Julie Flores nipadayag sa pagpasalamat sa pag develop sa maong pasilidad nga gipaabot nga makatabang sa mga konstityuwente sa lungsod. Sumala sa  Mayor, ang municipal council sa Barili una na kining nipasar og P9.2 million nga supplemental budget alang sa sweldo sa mga doctors, nurses, nursing aides, administrator, lakip na sa mga  medical apparatus ug ubang gikinahanglan sa maong pasilidad.

Si Kongresista PJ Garcia nisaad usab nga mohatag og P2.5 milyones nga tabang alang sa ambulansya sa infirmary ug P500, 000 alang sa mga medical equipment ug uban pa nga kinahanglan. —MEL (BANATNEWS)