Quarry operation sa duha ka barangay sa talisay gireklamo

Cebu, Philippines — Gireklamo sa mga molopyo sa Barangay Jaclupan ug Barangay Campo 4 sa Dakbayan sa Talisay ang gihimong quarry operations sa ilang dapit.

Kini human namatikdan nga nagsige nalang og dahili ug nangatagak ang mga bato ug yuta ngadto sa ubos nga bahin.

Si Mayor Gerald Anthony “Samsam” Gullas Jr. mitug- an nga iyang nang gipahibawo ang taga City Disaster Risk Reduction and Management Office (CDRRMO)    aron masusi ang  lugar.

Matud pa ni Gullas nga iyang tawagon ang atensyon sa taga Provincial Environment and Natural Resources (PENRO) aron matagaan kini og aksyon tungod kay sila man ang naghatag og permit sa quarry operation.

Lakip sa iyang gipahibawo sa sitwasyon mao ang taga Department of Public Works and Highways (DPWH).

Gihangyo sa mayor ang mga residenti sa lugar ingon man ang mga motorista nga mag-mabinantayon kanunay aron kalikayan ang disgrasya samtang gipaabot pa ang aksyon sa PENRO kabahin sa maong reklamo. (BANAT NEWS)