Mandaue naghangyo nga makasulod balik sa Cebu City ang ilang TPUJ

CEBU, Philippines — Naghangyo ang mga opisyal sa Dakbayan sa Mandaue sa Kagamhanan sa Dakbayan sa Sugbo nga tugotan na ang mga traditional public utility jeepney (TPUJ) sa Mandaue nga makasud sa kanhi nila mga rota dinhi sa Dakbayan.                                       

Si Konsehal Jimmy Lumapas nga maoy chairman sa committee on transportation sa konseho sa Dakbayan sa Mandaue mipasar og resolusyon kabahin niini nga giaprobahan usab atol sa ilang regular session.                    

Suma pa ni Konsehal Lumapas nga iyang gjhimo ang pagpasar og resolusyon human usab modangop ngadto kanila ang mga TPUJ drivers ug mga operator.                  

Lakip sa midangop sa ilang buhatan mao ang mga sakop sa Mandaue Transport Cooperative pinaagi sa ilang chairman nga si Loreto Gerez Jr.

Gisumbong sa maong mga drivers nga gidakop sila ug na-isyuhan og citation ticket sa mga traffic enforcer sa siyudad sa sugbo sa ilang pagsuway og sulod sa dakbayan.                          

Apil sa rota nga gitinguha nila nga mabalik mao ang gikan sa Dakbayan sa Mandaue ug paingon sa Ayala Mall, Country Mall ug Manalili.

Samtang sa laing bahin, padayon gihapon ang operation sa mga tinugyanan sa Cebu City Transportation Office batok sa mga sakyanan nga magpataka og parking.

Dili mominos sa pito ka mga barangay sa dakbayan sa sugbo ang gihimoan ug operation, Miyerkules sa kadlawon nga niresulta sa pag clamp sa dili mominos sa 99 ka mga sakyanan nga illegal nga nag parking.

Ang mga operation nahitabo sa Zapatera, Lahug, Apas, Talamban, San Jose, Banilad, ug kasambagan. Hugot gihapon sa ilang panawagan ang CCTO ngadto sa mga nanag-iya og sakyanan nga likayan ang pagpataka og parking daplin sa karsada aron dili makamulta. —Rowena D. Capistrano/MEL (BANATNEWS)