Misa Novena sa publiko gihunong

CEBU, Philippines — Gihunong sa kaparian sa Basilica Minore del Sto. Niño ang Misa Novena sa publiko ug himoong nalang kining virtual sugod karong adlawa.

Kini nahukman sa kapariang Agustino, kapolisan ug sa lokal nga kagamhanan sa Dakbayan sa Sugbo kagahapon sa hapon nunot sa padayong pagsaka sa bag-ong kaso sa Covid-19 sa dakbayan.

Sugod karong adlawa, virtual na ang Misa Novena gikan sa Basilica apan makahimo ra ang mga tawo nga makabisita sulod sa pipila ka gutlo alang sa pagyukbo sa Balaang Bata. Si Fr. Pacifico Nohara, OSA, rector sa Basilica Minore del Sto. Niño, nihangyo sa mga deboto nga tas-an ang ilang pagsabot ug pasensya dungan ang panghinaut nga sa sunod tuig maayo na ang lakat sa panahon.

Dugang pa ni Nohara nga basin ang nahitabo karon maayo usab kini nga gasa tungod kay maghiusa ang mga pamilya sulod sa tagsa-tagsa ka panimalay uban sa ilang banay.

Sumala pa ni Nohara nga sayud siya sa lainlain nga gibati sa mga deboto bahin sa pagkanselar sa mga pisikal nga kalihukan.

Apan angayan sab tan-awon nga ang kinabuhi gasa sa Ginoo ug gipahulaman ra kini sa tawo hinungdan nga adunay obligasyon ang katawhan sa pag-amping batok sa Covid-19.

Samtang suportado ni Cebu City Mayor Edgardo Labella ang maong desisyon sa kaparian. Gitataw hinoon ni Labella nga samtang nituman sa minimum health protocols ang manimbahay sulod sa simbahan apan sa gawas lisud ang pagkontrolar ilabi na sa dili mga residente sa Dakbayan sa Sugbo.

Ang virtual nga pamaagi sa Misa Novena magpadayon na kini hangtud sa Enero 17 nga mao ang kapistahan sa Balaang Bata.

Hinoon ang kaparian niingon nga mahimo gihapon nga makatan-aw ug makatambong ang katawhan sa misa pinaagi sa live streaming sa official Facebook page sa Basilica, YouTube Channel ug mga media outlets nga partner nila.

Bisan og wala nay public masses ang Basilica Minore del Sto. Niño, abli gihapon kini sa mga tawo nga gustong modagkot, mohalad og pag-ampo apan giklaro sa kaparian nga dili maghuot ang mga tawo ug wala’y misa nga makita ug madungog sulod sa Basilica kay ang virtual mass adto buhaton sa lugar nga dili ma-access sa mga tawo. —Decemay P. Padilla/GMR (BANATNEWS)