Taga Cebu City ra ang makasud sa Basilica

CEBU, Philippines — Kadto lang mga residente sa Dakbayan sa Sugbo nga may quarantine pass ug mga authorized persons outside residence (APORs) ang tugutan nga makasulod sa Basilica Minore del Santo Niño sa pagtambong sa Misa Novena.

Kini ang gibutyag ni Cebu City Police Office (CCPO) Deputy Director for Operations Wilbert Parilla.

“Ato gyu’ng gi-istrikto nga kato ra gyu’ng dunay quarantine pass ug katong mga APOR nga Cebu City residents ra sad,” matud ni Parilla.

Namatikdan ni Parilla nga nagkadaghan ang mga deboto nga manambong sa Misa Novena ilabi na sa hapon niadtong unang adlaw sa nobenaryo.

“Na-address dayon nato ang crowd although sa buntag sa opening, controlled gyud kaayo nato tanan,” matud ni Parilla.

Sugod kagahapon, nihimo na og kausaban ang CCPO sa pagpakatap sa ilang mga sakop tungod sa nagkadaghang mga deboto.

“Nagbunga gyud og maayo atong preparation although grabe gyud daghan gyud og tawo, need gyud og realignment sa deployment sa atong personnel,” sumala pa niya.

Matud ni Parilla nga kadtong dili kaayo kinahanglan og daghang polis ilang giibanan ug gibalhin sa lugar nga daghang tawo.

Nasuta sa kapolisan nga daghang manimbahay sa alas 5 ug alas 6 sa hapon tungod sa pagpanggawas na sa mga nanarbaho.

Hinoon hapsay ra ang pagpasulod ug pagpagawas sa mga manimbahay ug nagamit ang ilang gibansay atol sa send-off ceremony.

“Ang atong mga tawo, dili mani pareha sa Manila nga atong makita. Mosunod ra gyud sila kay mga deboto gud sila. So motuman ra sad gyud sila,” matud ni Parilla.

Anaa sa 500 ka tawo ang gipakatap palibot sa Basilica nga gilangkuban sa 340 gikan sa CPPO ug ubang force multipliers gikan sa simbahan, Prevention, Restoration, Order, Beautification, and Enhancement  (PROBE) Team, Cebu Environmental Sanitation Enforcement Team (Ceset), ug uban pa. –GMR (BANATNEWS)