Unang adlaw sa misa novena gidagsa, malinawon

CEBU, Philippines — Gidagsa sa mga deboto sa Balaang Bata, Señor Santo Niño, ang unang misa nobena alang sa kapistahan niini sa Basilica Minore del Sto. Niño kagahapon sa buntag.

Ang mga deboto namatikdan nga nisunod gyud sa basic health protocols sama sa pagsul-ob og facemask, face shield ug social distancing batok sa COVID-19.

Limitado ra ang mga tawo nga gipasulod sa Basilica ug kadtong wala na kasulod gipahiluna sa gawas nga bahin sa simbahan sanglit duna may gibutang nga mga markers ug lingkuran aron masunod gihapon ang physical distancing.

Sa wala pa gisugdan ang Santos nga Misa gipahigayon una ang enthronement sa imahe sa Balaang Bata dayon gisunod ang Santos nga Misa diin ang rector sa Basilica, Rev. Fr. Pacifico Nohara, OSA, ang nangulo.

Sa wali ni Rev. Fr. Nohara kini niingon nga bisan pa man sa pandemya wala kini nakapugong sa pagtuo sa katawhan nga niadto sa Basilica ug nisimba.

Gipahinumduman sab niini ang mga deboto nga angayang magpasalamaton nga gisaulog ang piyesta senyor niining tuiga kay mao sab kini ang kasaulogan sa ika-500 ka tuig sa pag-abot sa Kristiyanismo ug sa imahe sa Sr. Sto. Niño sa Sugbo.

Human niini, gisunod ang installation sa bag-ong Hermano ug Hermana Mayores nga sila si Anne ug Edmund Lui. Si Mayor Edgardo Labella sa pagsuroy niini sa simbahan iyang nakita nga “generally peaceful” ang novena mass samtang duna kini gihatag nga mando sa kapolisan ug uban pa sa pagbadlong sa mga magtapok.

Giklaro sab ni Labella nga sundon lang gihapon ang schedule sa paggamit sa quarantine pass sa dakbayan.

Kadtong mga dili residente sa siyudad magdala lang og quarantine pass aron makasulod sa simbahan ug ang mga authorized person outside residence magpakita lang sa ilang ID.

Curfew

Samtang gipahibawo ni Labella nga nagpagawas siya og executive order nga nag-usab sa curfew hours sa siyudad.

Imbis magsugod ang curfew alas 11 sa gabii hangtud sa alas 5 sa kaadlawon, gihimo naki og alas 11 sa gabii hangtud sa alas 4 sa kaadlawon aron paghatag og dalan sa novena mass sa Basilica. Gihulagway sab ni Rev. Fr. Nohara nga malinawon ang unang adlaw sa misa novena.

Apan matud ni Nohara nga lahi karon ang kalihukan sa kapistahan sa Balaang Bata kung ikomparar sa nilabay nga tuig tungod sa pandemya.

Sumala pa ni Nohara nga bisan sa Covid-19 padayon gihapon ang pagsaulog sa kapistahan tungod kay maayo kini nga blessings ilabi na sa mga deboto.

Dugang pa ni Nohara nga nakita niya karon nga mas hapsay ang sulod sa Basilica human gipatuman ang social distancing ug minimum health protocols kung ikomparar sa nanglabay nga katuigan diin dili halos maagian.

Awhag ni Nohara sa mga deboto ug katawhan nga padayon gihapon mosunod sa mga lagda aron malikayan ang sakit nga Covid-19.

Sa laing bahin, giawhag ang mga deboto nga buot mobisita ug motambong sa Santos nga Misa sa Basilica nga dili magdala og dagkung bag ug backpack aron dili na sila masangit sa inspeksyon.

Ang deputy director for operations sa Cebu City Police Office, Lt. Col. Wilbert Parilla, nitug-an nga tuyo niini nga dili langan ang pagsusi sa mga mosulod sa Basilica ug sa samang higayon alang usab sa seguridad.

Ang unang adlaw sa misa novena gitan-aw sa kapolisan nga hapsay ug malinawon. —Rowena D. Capistrano/GMR (BANATNEWS)