CCMC kinahanglan pa og Occupancy Permit ayha pa sila makadawat og pasyente

Cebu, Philippines — Una pa makasugod pagdawat og pasyente ang bag-ohay lang giinagurahang Out-Patient Department sa bag-ong edipisyo sa Cebu City Medical Center kinahanglan pa kining makabaton og Occupancy Permit gikan sa Office of the Building Officials.

Apan si Cebu City Administrator Floro Casas, Jr. gitrabaho na sa dakbayan pinaagi sa OBO ang paglukat og partial occupancy permit sa OPD sa bag-ong building.

Kahinumdoman nga gianugurahan ang unang tulo ka andana niini niadtong Lunes. Giinspeksyon na usab kini sa OBO kagahapong adlawa. Kun ma-okay na ang partial occupancy permit sugdan dayon ang pagpanawat og mga pasyente sa OPD.

“Ang atong gi-work out karon with OBO is the partial occupancy (permit) for that area only. While ato pang gi-ready pud ang second ug ang third floor for its opening sa sunod nga mga semana,” suma pa ni  Casas. Dugang pa niya nga naghuwat nalang siya sa signal sa OBO. “We’re expecting na mahuman ni today kay ang importante raman nga mohatag og go signal ang OBO. (If) safe ra siya then we can start accepting patients kay gabie nagovertime to sila og transfer sa mga gamit nila padung didto sa new CCMC,” niya pa.

Gisuwayan og tawag sa The Freeman Banat News  ang head sa OBO nga si Architect Florante Catalan apan dili kini makontak.  Human sa OPD, sunod nga buksan ang Imaging Department sa CCMC.

“Dili gyud ta makakuha og full occupancy permit, partial-partial lang gyud ta kay if magpaabot gyud ta anang full occupancy, abtan gyud tag siyam-siyam ana. Dili gyud ta makastart dayon, but we need to start gyud somewhere,” saysay pa ni Casas. Una na nga gibutyag ni Mayor Edgardo Labella nga target sa kagamhanan nga makompleto  ang 10 ka andana nga building sulod sa 18 ka buwan. (BANAT NEWS)