Ilisan si Dino?

Sibaw kaayo ang mga tabitabi karon sa media nga si Presidential Assistant for the Visayas Michael Lloyd Dino hulipan kuno sa katungdanan karong buwan sa Enero.

Daghan kaayo ang nangutana kanako kabahin niini, mao nga gipangutana nako ang usa ka dakong opisyal sa kagamhanan, ug giingnan ko niya nga siya nakadungog sab.

Pero, tambag nako sa akong mga kauban nga dili lang dayon kita motuo niini kay posible sab nga kini gipalakaw sa mga kontra ni Dino.

Gikontak nako ang pangabaga ni Dino nga si Assistant Secretary Jonji Gonzales, ug gitataw ni Gonzales nga dili kini tinuod.

Gani, gipadad-an ko og hulagway ni Gonzales sa panagtigum nila ni Dino ug sa ubang Cabinet secretaries kauban ni Presidente Duterte didto sa Malacañang.

Gipadala pa ni Gonzales kanako ang video ni Presidente Duterte nga nagpadayag og dako nga pagsalig kang Dino, nga matud pa iyang kaalyado ug confidante.

Aw, maayo nga nakahatag og katin-awan niini si Gonzales kay daghan ang nahingangha, apil na ko, kabahin sa mga mikatap nga tabitabi.

* * *

Matud pa sa mga mikatap nga tabi-tabi nga si Dino, hulipan ni Leoncio Evasco Jr. nga kaalyado usab ni Duterte. Gani, matud pa nga si Dino, tua na kuno gidestino sa Iloilo.

Apan namatud-an nga ang tabitabi dili diay tinuod kay si Dino dia ra sa Cebu, ug si Gonzales maoy gipatutok sa mga kalihokan sa Western Visayas.

Nagduda bitaw gyud ko sa mga tabitabi kay kon si Evasco na kuno maoy molingkod nga Presidential Assistant for the Visayas, mao kuno kini ang mangita’ kandidato sa PDP-Laban nga padaganon sa eleksyon sa 2022.

Mitingkag ang akong dunggan kay ang mga mikatap nga tabi-tabi nagkanayon, nga ang plano kuno nga si Tomas Osmeña maoy himoong standard bearer pagka mayor sa PDP-Laban dinhi sa siyudad.

Sa ato pa, dili na kuno si Mayor Edgardo Labella ang padaganon sa PDP-Laban. Kini hinoon nga puntoha mora’g kataw-anan na kaayo.

Nasayod baya kita kon unsa ang kasuko ni Duterte kang Osmeña tungod kay iyang gikontra ang mga polis kaniadto, ilabi na sa panahon ni Koronel Royina Garma.

Apan samtang dunay panultihon nga nagkanayon nga ang tanan adunay kausaban, ug ang buang ra ang dili makausab sa iyang hunahuna, pagkakaron makaingon kita nga dili pa katuohan ang mikatap nga mga tsismis.

Gitug-anan ko ni Gonzales nga nakadungog siya nga si Evasco gihatagan na man gani og katungdanan sa kagamhanan tua sa kaulohan.