Rehab center tukoron alang sa “drug pushers”

Cebu, Philippines — Gisugyot sa Cebu City Office for Substance Abuse Prevention (COSAP) ang pagtukod og rehabilitation center alang sa “drug pushers” nga pagatawgon og Balay Silangan.

Suma pa sa hepe sa COSAP nga si Jonah John Rodriguez nga posibleng maestablisar na kini sa unang bahin sunod tuig.

Gibisita na ni Rodriguez ang lugar diin adto tukoron ang rehab center kauban si Konsehal Phillip Zafra ug ang mga representante sa Philippine Drug Enforcement Agency.

Usa sa lugar nga ilang gitan-aw nga butangan sa Balay Silangan mao ang nahimutangan sa Cebu City Resource Management and Development Center (Cremdec) diha sa Barangay Taptap.

Suma pa ni Rodriguez nga epektibo kaayo ang mahimong rehab session kun ilain ang pasilidad sa “pushers” aron matutokan kini ug dili na matintal og balik sa pagpamaligya og drugas.

Sa higayon nga moistar kini og usa ngadto sa duha ka buwan  sa maong pasilidad, magpadayon gihapon ang laing hugna sa mga rehab session sa higayon nga makagawas na kini.

Kun maumol na ang rehabilitation center diha sa CREMDEC, target usab sa COSAP ang pag-umol na usab og dugang pasilidad nga ipahimutang sa laing property sa siyudad diha sa Barangay Guba kun diin dinhi usab ipahimutang ang “drug users”.

Samtang padayon gihapon ang COSAP sa pagpaubos og mga rehab session sa persons deprived of liberty (PDLs).

Aron malikayan ang panagtapok, mopili lang ang ilang mga kliyente og modular o online nga mga session o seminar.

Ang maong departamento mohimo gihapon og mga surpresang drug test alang sa mga empleyado sa City Hall ug barangay workers. ( BANAT NEWS)