Abogada gipusil patay

Cebu, Philippines — Patay ang usa ka abogada, human kini gipusil sa wala mailhing mamumuno sa may National Road, Barangay Looc, Danao City kagahapon adlaw nga Huwebes. Siya maoy ikaduha nga miyembro sa Integrated Bar of the Philippines dinhi sa Sugbo gipatay niining buwana.

Ang gipatay mao si Atty. Baby Maria Concepcion Landero Ole, biyuda ug residente sa Camaligbato, Barangay Taboc, Danao City.

Ang bana ni Ole nga si Juanito Flores Ole,35, biktima sab sa pagpamusil niadtong Mayo 26, 2020 diha sa E.Olivar St. Brgy. Poblacion sa mao gihapong dakbayan, ang mga mamumuno sa bana wala mailhi ug nagsakay og Sports Utility Vehicle.

Sumala pa sa imbestigasyon sa kapolisan sa Danao sa kamatayon sa abogada, nagsakay og motorsiklo ang nagpusil sa biktima.

Atol sa pagresponde sa kapulisan sa crime scene dali nila nga gidala ang biktima sa tambalanan apan gideklarar kini nga dead on arrival.

Blangko pa karon ang kapulisan ubos sa pagpangulo ni Police Major Maria Theresa Macatangay bahin sa motibo sa pagpatay sa biktima.

Wa pasab masayri kun ang pagpatay sa abogada may koneksyon ba sa pagpatay sab sa bana niini.

Ang Presidente sa IBP-Cebu Province Ria Lydia Espina, nikondenar sa pagpatay na usab sa lain nga abogado.

Sumala pa ni Espina, ang kamatayon ni Ole, napuno sa listahan sa mga wala pay kasulbaran nga mga pagpamatay dinhi sa Sugbo nga binuhatan sa wala pa mailhi nga mga mamumuno.

Gitug-an ni Espina, ang pagpangataki sa mga abogado, dili lang kini sa ilaha apan lakip na usab kini sa ilang legal profession ug sa balaod.

“The forging of a memorandum of understanding between the CPPO and the IBP Cebu has all the more become imperative and urgent to ensure the security and protection of lawyers who are vanguards of justice,” matud pang Espina.

Nanawagan karon ang IBP Cebu sa publiko nga mokooperar sa imbestigasyon ug mohatag og mga impormasyon kung aduna silay kasayuran aron masulbad kining mga kaso sa pagpatay nga nanghitabo karon sa Sugbo.

Niadto lang miaging buwan, gipatay sab si Atty. Joey Luis Wee sa mga lalaking misunod kaniya sa iyang pagsulod sa opisina diha sa Barangay Kasambagan sa Cebu City.

Nadakpan ug napasakaan na og kaso sa National Bureau of Investigation ang gitumbok nga triggerman ug nailhan na sab ang uban nilang kauban.