Duha ka abusadong enforcer gipatangtang ni Chan

Cebu, Philippines — Gitangtang ni Mayor Junard Ahong Chan sa serbisyo ang duha ka traffic enforcer sa City Traffic Management System (CTMS) sa Dakbayan sa Lapu-Lapu.

Kini human napamatud-an nga nag-abuso sa ilang trabaho ang maong mga enforcer base sa nakuha nga footage sa dash cam sa drayber sa van nga giingong ilang biktima.

Ang maong mga enforcer gipaubos kini sa imbestigasyon human ang nahisgutang drayber sa van nisumitir og footage.

Nakita sa footage nga niadtong Biyernes sa gabii ang motorsiklo nga giluwanan sa mga enforcer kusog nga nagdagan subay diha sa ML Quezon gikan sa MEPZ 1 sa Barangay Pusok, Dakbayan sa Lapu-Lapu ug ni-overtake kini sa nag-una nga kolor itom nga van nga gimaneho sa biktima.

Gumikan sa maong pag-overtake deriyot masaghid ngadto sa van ang motorsiklo ug giingong pag-abot diha sa unahan gipahunong sa mga enforcer ang van ug giisyuhan nila ang drayber og citation ticket nga reckless driving.

Ang biktima giingong nahibulong sa pagdawat niya sa citation ticket hinungdan nga nireklamo kini diha sa buhatan sa mayor ug gisumitir ang footage sa dash cam sa iyang sakyanan. Si Mario Napule, pangulo sa CTMS wala pa kini mohatag sa mga pangalan sa duha ka traffic enforcer.

Matud ni Napule nga ang maong mga enforcer gibalhin og laing destino ug gibawi-an na usab kini sa gidala nilang citation ug gipaabot pa usab niini ang termination order gikan sa mayor. ( BANAT NEWS)