Tanod miunay og lungkab sa barangay hall
CEBU, Philippines — Usa ka tanod sa Barangay Basak San Nicolas sa Dakbayan sa Cebu ang gidakop kaniadtong Lunes sa buntag tungod gipasanginlang milungkab sa ilang barangay hall, partikular na Treasurer’s Office sa barangay, Domingo sa gabii.
Ang mga pulis gikan sa Mambaling Police Station miila sa tanod nga si Franklin Gerat. Gidakop nila siya sa Barangay Pooc, Dakbayan sa Talisay pila ka oras pagkahuman sa pagpanglungkab.
Si Police Major Dindo Juanito Alaras, hepe sa Mambaling Police Station, nagkanayon nga si Gerat gipasanginlang nikuha og P2,500 gikan sa maong opisina kini bisna pa napakyas kini pag-abli sa vault diin gitago ang pundo sa barangay.
Nadawat sa Mambaling Police ang break-in alarm alas 6 sa buntag kaniadtong Lunes human ang utility worker nga si Aurelia Alquino nakabantay sa pultahan sa maong opisina nga naguba. Ang steel cabinet sa sulod, nga gisudlan sa vault diin gitago ang kuwarta sa barangay, nakit-an usab nga abri na.
Matud ni Alaras kinahanglan nilang imbestigahon ang mga tanod sa barangay nga nag-duty anang adlawa kun nganong wala sila makabadlong o makabantay sa gibuhat sa ilang kauban.
Ang maong tanod giingong dul-an na 10 ka tuig nagserbisyo sa maong barangay.
“Wala pa mi background jud kung unsa iyang (motive), pero kasagaran basta kay umaabot ang Pasko, first ang temptation kay daghang mga bonus,, second, iya sad guro pang gasto unta nga kwarta kay wala pa man pud mi makuha nga background kung adik ba siya, wala pa man pud mi makuha nga information, “ matud ni Alaras. “Sa pagkakaron wala pa tay matumbok o ma formulate na idea nga naa siyay kauban kay sa pag review nato, siya raman gud siya ray gaputol sa mga CCTV, sa iya pa ta naka focus,” sigon ni Alaras.
Sa pagkakaron, girekomenda ni Alaras sa mga opisyal sa Barangay sa Basak San Nicolas nga mag-background checking sa tanan nilang mga tanod ug ubang empleyado.
Ikaduha, tungod kay adunay nay CCTV camera nga naka-install, girekomendar niyang ibutang ang mga pundo sa lig-on ug mas luwas nga lugar aron malikayan nga mahitabo ang pagpanglungkab. —IBM (BANATNEWS)
- Latest
