Bata nakalas, duha naangol human niulbo ang buhatanan og pabuto

CEBU, Philippines — Usa ang patay ug duha ang grabe nga naangol pagulbo sa payag nga buhatanan og pabuto diha sa Purok Shooting Star sa Barangay Babag sa Dakbayan sa Lapu-Lapu sa miaging gabii. Si Nagiel Bañacia, pangulo sa City Disaster Risk Reduction and Management Office (CDRRMO) miila sa namatay nga mao si Jomar  Dico, 13,  samtang ang naangol mao ang magulang niini nga si Mary Jean, 17, ug ang ilang inahan nga si Marivic, 31, pulos nagpuyo sa maong dapit.

Matud pa ni Bañacia unang gidala ang inahan ug anak nga naangol ngadto sa Lapu-Lapu City Hospital apan dali kini nga gibalhin ngadto sa pribadong tambalanan tungod sa kadako sa kadaut nga ilang nahiaguman. Ang 13- anyos nga lalaki maoy nagrabehan hinungdan sa hinanaling kamatayon niini.

Matud pa nga namutol sa gisumpaysumpay nga pabilo sa pabutong “Rambo” ang mga biktima sa dihang kalit lang kining mikidlap dayong misilaob ug gidakop sa uban pang pabuto hinungdan sa pagulbo.

Wala maapil ang amahan sa banay kay nigawas kini sa ilang payag aron mahunaw sa kamot tungod padulong na silang manihapon.

Si Major Junard Chan  miadto sa maong lugar ug mimando gilayon sa pagpahunong sa pagpamuhat og pabuto sa maong barangay.

Gipadad-an sab og relief goods ang mga mamuhatay og pabuto nga naapektahan sa kamandoan sa mayor. Ang kapolisan ug Bureau of Fire Protection padayon pang naghimo og imbestigasyon bahin sa maong aksidente. ( BANAT NEWS)