Pagkubos sa kaso sa Cebu City gihangop

Cebu, Philippines — Usa na ka semana nga nagtala lang og single digit kada adlaw ang mga bag-ong kaso sa Covid 19 sa Syudad sa Sugbo kini base sa pamahayag ni Cebu City Emergency Operations Center (EOC) Deputy Chief Implementer ug konsehal sa Sugbo Joel Garganera.

Gikalipay ni Garganera ang maong report tungod kay niadtong buwan sa Nobiyembre ang siyudad adunay double digit halos kada adlaw, ang pinakadako niini 59 ka kaso niadtong ika-14 sa Nobiyembre. Naglaum lang si Garganera nga ang tanan magtinabangay ug magpadayon sa pagsunod sa mga minimum nga protokol ug dili gyud magkompyansa.

Sa case bulletin sa Department of Health-VII petsa Disyembre 4, ang Dakbayan sa Sugbo adunay total nga 203 nga aktibong mga kaso lakip ang upat nga bag-o anang adlawa.

Ang mga kaso sa dakbayan naminusan human naka recover ang 23 ka buok apan dunay usa nga namatay niadtong Disyembre 3.

Ang EOC nipakusog sa ilang contact tracing ug testing hangtod sa second-generation contacts.

Ang Cebu City adunay kinatibuk-ang 10,676 total cases  gikan sa pagabot sa pandemiya sa siyudad. Apan ang 9,787 niini nangaayo na.

Sa pikas bahin, ang Lapu-Lapu adunay aktibo nga kaso nga 109 gikan sa kinatibuk-an niini 2,627 ka mga kaso. Apan ang 2,409 niini nangaayo na og 109 ang namatay.

Samtang ang Mandaue adunay 64 pa nga aktibo nga mga nahabilin gikan sa 2,664 total cases niini, 2,430 sab ang nangaayo na ug usa ang nadugang sa mga nakalas nga miabot na karon og 170. Ang mga probinsya sa Central Visayas, ang Bohol adunay aktibo nga kaso nga 158, ang Lalawigan sa Cebu adunay 204, Negros Oriental adunay 182 ug Siquijor adunay lima.

Sa datos sa DOH-7 ang Central Visayas dunay 24,264 total cases sa COVID-19 diin 925 ang active cases; 21,947 ang recoveries ug 1,392 ang deaths. — Decemay P. Padilla/IBM ( BANAT NEWS)