Most outstanding social worker sa Talisay gipasigarbo

Cebu, Philippines — Dakong garbo sa mga Talisaynon nga napili nga most outstanding social worker sa tibuok Pilipinas ang ilang kauban.

Si Felipa “Bebeth” Solana, 62 anyos nga pangu sa City Social Welfare and Development mao ang midawat sa pasidungog.

Matud pa niya nga 41 ka tuig na siya nagserbisyo isip social worker samtang 30 ka tuig siya sa Dakbayan sa Talisay.

Siya nagkanayon nga gusto siya nga mosuroy sa nagkalain-laing dapit hinungdan sa iyang pagsulod sa social service, apan nadugay iya na nga gihigugma ang maong trabaho sa paghatag og serbisyo sa nanginahanglan.

Suma pa ni Solana nga grabe ang iyang kaguol human ang iyang inahan ug bana nagsunod og kamatay apan wala kini nakapaundang kaniya, inay mas gigahin niya ang iyang oras sa trabaho.

Si Mayor Gerald Anthony “Samsam” Gullas Jr. nitataw nga dugay na sila nga nakakita sa mga nahimo ni Solana hangtud nga ang tibuok Pilipinas na gyud ang nakakita niini.

Matud pa niya nga garbo nila nga nakauban si Solana sa iyang administrasyon gumikan sa iyang mga trabaho. Ang mga kauban ni Solana nihulagway nga hands on ang ilang labaw sa natad sa ilang paghatag og serbisyo sa mga nagkinahanglan sa ilang tabang. ( BANAT NEWS)