National Youth Day gipangandaman sa simbahan

CEBU, Philippines — Commission on Youth sa Archdiocese of Cebu adunay giandam nga kalihukan subay sa nagsingabot nga National Youth Day karong Disyembre 16, 2020 atol sa unang adlaw sa misa de gallo.

Kini ang gitug-an ni Fr. Andrei Ventanilla, ang chairman sa COY sa Archdiocese of Cebu.

Matud pa ni Ventanilla, gikan sa Disyembre 12 aduna silay gi-preparar nga mga webinar alang sa mga batan-on hangtud sa petsa 16 nga ipaagi lang sa online.

Ang highlight sa maong kalihukan sa National Youth Day mao ang quiz bowl sa ipahigayon nila nga mga webinar. Giawhag ni Ventanilla ang kabatan-onan nga padayon gihapon sa ilang pagpanerbisyo diha sa ilang mga parukya ug pabilin nga motamod sa social distancing ug health protocols.

Samtang sa laing bahin, sayo nga mitunol og paskohanong mensahe alang sa kabataan ang regional director sa Department of Education (DepEd-7) nga si Dr. Salustiano Jimenez diin iyang gipanghimug-atan ang ka importante sa edukasyon.

Suma pa ni Jimenez bisan sa gisagobang nga pandemya, dili gyud kalimtan ang selebrasyon sa Pasko.

Alang sa mga tinun-an, usa sa nindot kaayo nga regalo alang sa ilang mga kaugalingon mao ang pagtarong sa ilang pag-eskwela.

“Magtarong gyud ta sa atong pagtungha, kay para sa inyo raman sad ni nga kaayohan ilabi na sa inyong kaugmaon,” nagkanayon si Jimenez.

Suma pa ni Jimenez nga makabaton usab og holiday break ang mga tinun-an ug kutob nalang karong Disyembre 12 ang klase sa mga bata ug mobalik sila unya sa Enero 4,

Samtang ang mga magtutudlo usab motambong og seminar nga magsugod sa December 14 hangtud sa 19. —Sanden J. Anadia/MEL (BANATNEWS)