PRO-7 dunay bag-ong direktor

CEBU, Philippines — Bag-ong director sa Police Regional Office (PRO) 7, Police Brigadier General Ronnie Montejo milingkod na puli kang Brig. General Alberto Ferro sugod kagahapong adlawa ug subling mipahinumdom ang bag-ong opisyal sa mga sakop nga kinahanglang hiniusa ang mga lihok ug estriktong sundon ang mga mando ug giya gikan ni Philippine National Police (PNP) Chief Debold Sinas.

Gihisgotan sab niini ang pagpahugot pa gyud sa kampanya batok sa illegal nga drugas ug pag-ila ug paglutos niadtong mga narco-cops o kadtong mga polis nga protector sa illegal nga drugas ug mga ninja cops, mga polis nga mo-recycle sa mga ebidensiyang illegal nga drugas nga nakuha sa mga operasyon. Si Montejo sa iyang speech atol sa turnover command ceremony kagahapong adlawa midasig sa iyang mga sakop nga tutokan ang mga gimando ni Sinas kini mao ang kampanya batok sa illegal drugs, illegal gambling, terrorismo o insurgency ug kurapsyon.

“The PNP will continue to innovate to further enhance its current programs to be at pace and cope with the prevailing peace and order situations on campaign against illegal drugs. We need to revitalize the different drug enforcement units to focus their operations on anti-illegal drugs and the apprehensions of high value targets and the identification and neutralization of the ninja and narco- cops including its associated networks,” matud niini. Aron sab masiguro ang integridad kinahanglang ang mga miyembro sa drug enforcement units wala malambigit o wala gidudahang nalambigit sa illegal drugs sukad-sukad.

“We will also fortify the competency of police operative in anti-drug war by equipping them with right knowledge and strength through training and equipment,” dugang sa heneral.

Mipasidaan sab siya bahin sa “No Take Policy” gikan sa mga sindikato sa illegal nga drugas  ug gambling lords ug uban pang tinubdan sa kwartang ilegal.

Bawal sab maglulinghayaw sama sa pagduwa og golf sa oras tingtrabaho ug bisan pa og off-duty na sila anang adlawa gawas lang kun Sabado ug Domingo. Magatubang og kaso kadtong makalapas.

Gimando sab niyang pangusgan ang pagronda sa mga illegal gambling operators ug ipadayon sab niini ang gipangusgang kampanya batok sa insurhensiya.

“Our campaign against criminality to optimize police services to the communities, police visibility will be strengthened. The deployment scheme of 15 percent duty at the headquarters and 85 percent on field for more focus on operations and crime preventions,” sumala pa ni Montejo.

Si Montejo kanhi director sa Quezon City Police District. Ang turnover ceremony gisaksihan ni PNP Lieutenant General Guillermo Eleazar, deputy chief for administration  ug nilang Presidential Assistant for the Visayas Michael Dino, Lapu-Lapu City Mayor Junard Chan ug Mandaue City Mayor Jonas Cortes , Cebu City Councilor Joel Garganera.

Si Ferro maoy mangulo sa Department of Information and Communications Technology Management sa Camp Crame sa kaulohan.

Si Montejo usa ka Talisaynon ug nagdako sa Liloan. Nahimo siyang hepe sa kapolisan sa lungsod sa San Francisco sa Camotes Island, Catmon, ug Sogod.

Gipangulohan sab niya ang provincial mobile force company sa Toledo City ug isip regional engineer sa PRO 7 kaniadto.— The Freeman/IBM