Ang kandila sa Adbiyento

CEBU, Philippines — Ang pulong “Advent” nagagikan sa pinulongang Latin nga “adventus,” nga nagngahulogan  “coming,” ug senyales sa pagsugod sa lain napud nga usa ka tuig nga liturhiya sa Simbahan. Dako kini og kahulogan sanglit mao kini ang selebrasyon sa pagprepara sa pagkatawo ni Kristo sa Pasko.

Sukad pa sa una, ang selebrasyon nakatutok sa panindutay sa dayan-dayan sa Pasko ug pagpatukar sa mga pamaskong musika sa pagsugod palang sa “ber months.”  Buhi kaayo aning mga buwana ang mga patigayon tungod kay mamalit man ang mga tawo aron igasa, mag-organisar og mga Christmas parties, reunions ug tapuk-tapok sa mga kahigalaan, pamilya ug mga katrabaho.

Tingali karon, nakasugod na ang tanan sa ilang preparasyon.  Tungod tingali sa hulga sa global coronavirus pandemic, medyo dili kaayo langas ang preparasyon. Naa pa ang virus, gani dinhi sa ato misaka pagbalik ang mga kaso human sa pila ka semana nga pagkubos niini. Mas dyutay nalang sab ang mga tawong makita nga namalit tungod aning higpit nga border controls ug safety protocols. Ang US nga maoy kinagrabehan nga naigo ug padayon ang pagsaka sa mga kaso ug daghang nangamatay human ang bag-ohay palang nga eleksyon. Liboan na ang nakalas sa tibuok kalibotan mao nga dako gyud ang kabalaka sa katawhan bisan asa.   

Karon, atong dagkoan ang “Shepherd’s Candle,” mao ni ang unang “purple candle” sa atong korona sa adbiyento. Nagpahinumdom kini kanato sa “kalipay” sa pagabot ni Hesus. Samang kalipay nga nabatyagan ni Birheng Maria, San Jose ug sa mga nakasaksi sa pagpakatawo sa Balaang Batang si Hesus sa pasongan sa Bethlehem  liboan ka mga tuig na ang nakalabay.

Gipakatawo siya sa kwadra sa mga hayopan, way grandiyosong pangandam, way fireworks ug bisan unsa pa. Tingali ingon niini gyud ang pagsaulog sa Pasko, mas daghan ang kahulogan ug menus sa mga kasikas ug naghinobrang gastos.

Karong panahona maayong pangitaon si Hesus diha sa mga grabeng naapektahan sa pandemiya, kadtong mga nawad-an og trabaho o negosyo, kadtong natakboyan sa virus, nag-inusara sa isolation ug masakiton, ug sa mga tawong nawad-an og kabanay. Daghan ang nagdanguyngoy karon nga nangayo og panabang, daghan ang naglisod sa pagbangon ug nagpaabot nga dunay moagak kanila makabarog.

Ang pagpakabana ug pagpakita og kabalaka para sa mga kabus way utlanan, way relihiyon, tribu o kolor. Ang tanan, dato ug mga adunahan gidasig sa pagbuhat niini, kay mao kini ang gusto ni Hesus nga atong buhaton. Pagpakita kini kun unsa ka manggigiluy-on ug mapahiubsanon ang kasingkasing sa tawo nga maoy gipakita ni Kristo pinaagi sa Iyang sakripisyo alang sa atong kaluwasan. Gipanganak Siya para magpakamatay kanato.

Unta magmalipayon ang tanan bisan sa simpleng selebrasyon kauban ang atong mga mahal sa kinabuhi karong tuiga, tingali bisan layo sa uban natong kaparyentihan ug kahigalaan aron pagsunod sa social-distancing protocols  alang sa tagsa-tagsa nato nga kaluwasan ug proteksyon.

Ayaw paghuna-huna nga way ayo ang Pasko karong tuiga tungod kay kini usa ka selebrasyon sa gugma, kalinaw ug paglaum para  sa tanan.—IBM