Ceres of accidents

Nagkaduol na ang Pasko. Tungod sa padayong kasiga-bagsik ni COVID-19, miawop ang daghang negosyo. Hasta series sa Christmas lights sa mga panimalay, miawop sab.

Minilyong empleyado ang nawad-an og trabaho. Ubay-ubay’ng kawani, kinsa mao pay pagtungtong sa 60, napugos intawon pagretiro. Ang nakaporke, kumpaniyang gialagaran, wala pa makarekober. Busa, unsa bay pabawon ang ikahatag?

Pun-an pa sa bag-ong sistemang gigamit sa Social Security System (SSS) nga daw dili senior citizens-friendly. Ay, nadugangan ang kahabog sa kalbaryong giatubang. Hinungdan, may mga mamumuo, kinsa bisag edaran na, milahutayg panrabaho taliwala ning makalilisang pandemiya.

Pipila kanila, magbiseklita o magmotorsiklo paingon ug gikan sa ilang trabahoan tipon sa mga higanteng sakyanan sama sa Ceres buses nga magbiyahean sa huot kadalanan ning dakbayan sa Sugbo.

Kaniadto, ang mga dagkong trak de pasaheroan, magmainampingon gyong magmaneho pag-abot sa syudad tungod sa kadaghang sakyanan. Busa, minus ang disgrasya. Pero karon, pag-entra sa pamasaheroang Ceres buses, halos kada adlaw, nagsunodsunod lang ang disgrasya.

Kon dili biseklita ang latayan, motorsiklo ang ligsan. Or, ambulansiya o van maoy banggaan. Ngano? Tungod kay ang Ceres drivers naanad pagmaneho sa mga halapad, dagkong karsada. Ug nakalimot nga anaa na diay sila sa gagmay’ng kadalanan sa dakbayan.

Nagsalig nga dakong trak ang gidala. Moderetso la’g hunong sa daplin nga usahay dili na motan-awg side mirror.

Ang dugang risgo, dili makita sa drayber didto sa ilang side mirror ang gagmayng sakyanan nga naa tupad ubos sa taas-habog lawas sa Ceres bus. Unya usahay, bisag alanganin na, moobertik gyod!

Busa, kining Ceres buses nga nagdagan sa dakbayan, kuyaw. Wala lang momugnag series of accidents but also a series of fears sa mga traveler. Upat na baya ka kinabuhi ang nakalas gumikan sa ilang kadanghag.

Apan sobra ka humok og kasingkasing si Cebu City Mayor Edgar C. Labella. Imbes ipa-ban dihadiha ang operasiyon sa Ceres buses, iya unang gipatawag ang tag-iya sa Ceres buses, Udutco, LTO-7, LTFRB 7. CCTO, CPPO ug TPG aron ilang tun-an unsay angay buhaton nga mapugngan ang samang hitabo.

Stern warning ray gihatag nga disciplinary action. Ug kon makamugna pa’g dugang aksidente ang Ceres drivers, ayha pa kini hingpit ipa-ban sa mayor.

Pagkalumog balatian. Unta, dili abusohan!