Fluvial procession sa fiesta sa Birhen sa Regla kanselado
CEBU, Philippines — Hingpit na nga gikanselar ang tinuig nga fluvial procession sa Imahen sa Birhen sa Regla nga maoy patron sa Dakbayan sa Lapu-Lapu atol sa pagsaulog sa fiesta karong Nobyiembre 20 ug 21, 2020.
Si Padre Bernard Corpus nga maoy parish priest sa Nuestra Señora de Regla Parish National Shrine maoy mipahibalo niini niadtong miaging adlaw.
Matud pa niya nga ilang nakab-ob ang maong hukom nga pagkanselar sa fluvial procession aron paglikay sa panagtapok sa mga deboto atol unya sa pagahimoong kalihokan.
"Pagkakaron, dili madayon ang fluvial kay nasayod na man kita nga daghan gyod ang mga deboto nga mosugat sa Imahen sa iyang pag-abot, mao na nga among gilikayan nga dunay panagtapok sa daghang mga tawo." Suma pa ni Padre Bong Corpus.
Gitug-an ni Corpuz, nagka tigum na sila sa City Tourism Cultural and Historical Affairs nga gipangulohan ni Cindi Chan ug ilang nasabutan nga mopahigayon lang ug motorcade inay nga fluvial procession unya sa Nobyiembre 12.
Ang kapistahan karon sa Nuestra Seniora de Regla, ika 285th nga adunay tema “Maria Birhen sa Regla, among paglaum ug malig-ong dalangpanan sa kanunay ilabi na niining panahon sa pandemya”
Kahinumduman sa nangaging katuigan ang fluvial procession sa Imahen sa Birhen sa Regla salmotan sa daghang debotos nga naggikan pa sa nagkalain-laing dapit sa nasud.
Human sa fluvial procession daghan sa mga deboto ang magdasok sa pagsugat sa imahen ug dalhon kini balik sa simbahan sa National Shrine sa Birhen sa Regla sa Barangay Poblacion ug pagahimoon ang arrival mass. —Rowena CapistranoMEL (BANATNEWS)
- Latest
