Sugbo natapsingan ra sa Super Typhoon Rolly

CEBU, Philippines — Walay natala nga kadaot didto sa Northern Cebu bisan og gipaubos kini sa storm signal warning tungod sa super typhoon Rolly nga mikusokuso sa Central Luzon apan tungod sa gilapdon niini lapad nga bahin sa Pilipinas ang naapektahan lakip ang Sugbo. Hinuon adunay daghang mga pasahero sa Danao Port nga motabok unta padung sa Camotes island ang natanggong human wa palargaha ang mga ferry boats padung didto tungod sa dautang panahon.

Unang gipaubos Blue Alert Disaster Response Level ang tanang Local Disaster Risk Reduction and Management Office (LDRRMO’s) sa Northern Cebu human pipila ka areas didto ang gipaubos sa Typhoon Signal Number 1.

Ang San Remegio, Bogo City, Medellin,Daan Bantayan ug Bantayan Islands ang naapil sa Signal Number 1 sa PAG-ASA kagahapon sa buntag apan gilibkas ra usab kini kagahapon sa hapon.

Matud ni Rhee Telen Jr., tigpamaba sa Provincial Disaster Risk Reduction and Management Office (PDRRMO) nga kasarangan nga pag-ulan sa pipila ka dapit sa amihanang Sugbo ang nasinati sugod kagahapon sa kaadlawon apan walay pagpabakwit ang nahitabo.

Alas-3 sa hapon gitugotan na sa Philippine Coastguard ang biyahe sa San San Remegio matud ni Telen. Sugod Oktubre 30, 2020 gisugdan na sa PDRRMO ang pag-coordinate sa mga LDRRMO’s pagpahigayon og pro-active measures sa ilang Areas of Reponsbility.

Didto sa Dakbayan sa Bogo, nakasinati og pag-ulan ang syudad kagahapon sa kaadlawon, apan wala ray natala nga kadaot. Ang LDRRMO sa Bogo nagmuntar og siren sa baybayon.

“Patingogon to namo ang alarm, para mahibalo ang mga tawo nga kinahanglan na sila mobakwit,” matud Rexanne Ygot Jr.,responder sa Bogo .

Samtang didto sa lungsod sa Daanbantayan, nakasinati usab og pag-ulan ang lungsod niadtong niaging gabie apan dili kaayo kini kusog. Matud ni Victor Tancawan ang disaster officer sa lungsod, walay pre-evacuation nga gihimo tungod dili man kusog ang pag-ulan o hangin.

Apan adunay mga barangay o areas sa lungsod nga prone sa pagbaha ug pagdahili sa yuta nga ilang gibantayan sama sa barangay Malingin, Paypay, Tominjao, Lanao, Poblacion, Aguho ug Tapilon. /IBM (BANATNEWS)