Perfect score batok sa COVID-19

Wala pa man hingpit nabuntog ang coronavirus disease o COVID-19 apan nakapuntos na og dako ang dakbayan sa Sugbo.

Nakakuha kini og perfect 10 ug ang naggrado niini walay lain kon dili si COVID Overseer Secretary Roy Cimatu.

Mibalik ang opisyal kagahapong adlawa didto sa EOC sa dakbayan diin iyang gitigom ang mga opisyal nga naglakip ni Mayor Edgardo Labella ug tanang mga naglangkob sa krusada batok sa virus.

Ang katuyoan sukwahi sa unang pagtunob sa opisyal sa dakbayan sa Sugbo nga grabe pa kaayo ang kaso sa COVID-19 nga subsob kaayo ang brainstorming sa mga estratehiya unsaon pagpakgang sa virus.

Apan kagahapong adlawa gaan na kaayo ang palibot nga makita na ang pahiyom sa panagway sa mga mitambong sa panagtigom.

Kini tungod kay giila sa COVID overseer ang kalamposan sa pagpakgang sa COVID-19 contagion, gipasalamatan niya ug gidayeg niya ang lokal nga kagamhanan ug ang tanang mga frontliners.

Matud ni Cimatu nga kaniadto epicenter sa COVID-19 ang Cebu City, apan karon epicenter na kini sa best method nga gihimong sumbanan sa ubang mga dapit sa nasud.

Dihang akong gipangutana si Cimatu pila ang iyang grado nga ihatag sa dakbayan sa covid response, sa walay pagduha duha perfect 10 ang iyang gihatag.

Seguro alang sa uban ilabi na kadtong mga kritiko, mosaka ang kilay nganong perfect score man nga naa pa may mga active cases ang syudad?

Apan para nako, mo-agree ko sa assessment ni Cimatu kay dili lalim ang pag-contain sa virus nga mihugpa sa dakbayan ug mitakboy sa kapin 10 mil.

Apan sa hinayhinay apan lahutay nga kombati, inanay kining nabuntog sa syudad.

Usa ka higayon niana gikahadlokan ang Cebu City. Literal gyud nga gikahadlokan ang mga tawo nga nagpuyo o mosulod sa dakbayan tungod kay giisip naman kini nga COVID-19 land.

Gibiaybiay kaniadto, gibansasgan nga gahi og mga ulo.

Apan kining tanan nabali na karon tungod kay ang pamaagi nga gipatuman mao naman ang template sa ubang dapit nga padayon ang pagtaas sa COVID-19.

Taliwala sa maayong kalamboan, dili gihapon angayan nga mokompyansa tungod kay sa usa ka sipyat lamang mamahimong makuhaan ang score kong magpasagad ang mga tawo.