83 establisamento pakigkitaan ni Labella
CEBU, Philippines — Gipatawag alang sa usa ka tigum ni Cebu City Mayor Edgardo Labella karong sunod semana ang 83 ka mga establisamento nga giingong nakaali sa mga kasapaan sa siyudad.
Matud ni Labella sagad sa mga estraktura dugay na nga natukod nga maoy rason nga ang mga nakalabay nga mga administrasyon wala magmalampuson sa pagpagtangtang niini bisan og nabalda na ang agianan sa tubig.
Pinaagi sa Office of the Building Officials(OBO) na-identify nila ang mga establisemento.
Hinuon sa dili pa mohimo og legal nga lakang ang siyudad batok kanila gusto sa mayor nga makig-estorya kanila aron makaumol og engineering solution sa problema. Nangita sab ang siyudad og relocation sites alang sa kapin sa 1,000 ka informal settlers nga nagpuyo kilid sa sapa nga nameligro kanunay sa baha panahon nga tinguwan.
Suma pa niya nga ang pagbalhin og kapuy-sa informal settlers makahatag og kontribusyon sa pag-recover sa 3-meter easement sa mga kasapaan.
Gitataw sa mayor nga walay mahitabo nga demolisyon kun dili mapahimutang og laing kapuy-an ang informal settlers.— Sanden J. Anadia/IBM (BANATNEWS)
- Latest
