Mga drayber sa e-scooter pasul-obon og helmet
![Mga drayber sa e-scooter pasul-obon og helmet](https://media.philstar.com/photos/2020/10/21/e-scooters_2020-10-21_00-36-34.jpg)
CEBU, Philippines — Si Konsehal Jerry Guardo sa Dakbayan sa Sugbo niduso og ordinansahon nga nagmando sa mga drayber sa electric scooter (e-scooter) o bike (e-bike) nga magsul-ob og protective helmets ug reflectorized stickers/vest/lights.
Ang maong ordinansahon nga gitawag og “E-scooter and Bike Helmet and Reflectorized Ordinance” gi-refer kini sa Committee on Laws, Ordinances, and Styling alang sa pagtuon.
Base sa section 4 sa ordinansahon nga kinahanglang magsul-ob og protective helmets ug reflectorized stickers/vest/lights ang tanang drayber sa e-scooter ug bike samtang nagmaneho diha sa kadalanan o highway sa siyudad.
Ubos sa section 5 sa maong ordinansahon nga dili molapas ngadto sa 30 kilometer per hour (kph) ang gikusgon sa pagpapadagan ug kinahanglang magmabinantayon ang drayber niini.
Ang makalapas duna kini multa nga P1,500 sa unang kalapasan; P3,000 sa ikaduhang kalapasan; ug P5,000 ug pagkompiska sa e-scooter/ bike sa ikatulong kalapasan.
Sa laing bahin, nakabalik na sa ilang operasyon ang usa ka public transport nga adunay online app sugod kagahapon sa kadlawon. Pinili lang ang mga lugar ug nalakip niini Sugbo.
Nasayran nga 450 ka units na ang gadagan dinhi sa Sugbo ug duha lang ka pasahero ang mahimong mosakay matag unit aron masiguro ang social distancing. Sanden J. Anadia/BDB (BANATNEWS)
- Latest