Toledo hugot gihapon nagbantay sa ilang border

CEBU, Philippines — Bisan og nagkaminos na ang kaso sa COVID-19, hugot gihapon nga gibantayan sa kagamhanan sa Dakbayan sa Toledo ang ilang border kun utlanan.

Kini suma pa ni John Roseller Layan ang information officer sa Dakbayan ug matud pa niini nga magkinahanglan gihapon sila og mga dokomento sa mga tawo nga mosulod sa siyudad.

Subay niini gihangyo niya ang katawhan nga mobisita sa Toledo nga kadto lang dunay importante nga katuyuan ang moadto aron malikayan ang pagkatap sa coronavirus disease.

Nagkanayon si Layan nga dili sila mokompyansa busa lapad gyud ang pagbantay sa ilang mga border.

“Basta kun moadto ta og Toledo, kinahanglan nga importante lang gyud ang tuyo o essential purpose,”matud pa ni Layan.

Nasayran moabot nalang sa 30 ka active cases sa COVID19 ang natala sa Toledo gikan sa kapin sa 200 ka kaso nga natala niini kaniadto.

Istrikto usab ang pagpatuman nila sa health protocols sa tanang establisamento sa maong dapit. /MEL (BANATNEWS)