Mga nasakmit nga ilegal nga drugas gikatakdang sunogon

CEBU, Philippines — Ang mga ilegal nga drugas nga nasakmit ug nadesisyonan na sa korte gikatakda na kining sunogon. Kini ang gibutyag sa direktor sa Philippine Drug Enforcement Agency (PDEA)-7 Levi Ortiz atol sa gipahigayong tigom sa mga nagkadaiyang ahensiya nga gilangkuban sa Cebu City Police Office, Cebu City Jail, PDEA-7, Regional Intelligence Division (RID)-7 niadtong Martes sa buntag.

Matud ni Ortiz nga gikatakda na unta ang pagsunog sa nahisgutang mga ilegal nga drugas niadtong buwan sa Agosto niining tuiga ngadto sa Negros apan tungod sa COVID-19 pandemic wala kini madayon.

Nakadesisyon na usab unta sila sa destruction sa mga ginadiling drugas sa Dakbayan sa Sugbo apan tungod usab sa COVID-19 hinungdang maglisod gihapon sila sa usa ka pribado nga kompaniya sa siyudad nga adunay kapasidad sa pagpahigayon sa pagsunog.

Gitug-an ni Ortiz nga nakig-alayon na siya kang Governor Gwendolyn Garcia atol sa iyang courtesy call ug nipasalig kini nga makig-alayon sa nahisgutang kompaniya.

Gibutyag ni Ortiz nga nikabat ngadto sa 11 ka kilong shabu, 20 ka kilong marijuana ug mga expired drugs nga nikantidad tanan ngadto sa P6 milyones ang gikatakdang ipaubos sa destruction. Matud usab ni Ortes nga motuman sila sa kamandoan sa presidente sa nasud nga sunogon ang mga ilegal nga drugas nga nasakmit.

Dugang ni Ortiz nga aduna pay mga ilegal nga drugas nga ilang nasakmit ang dili pa nila pweding sunogon tungod kay padayon pa ang kaso ug wala pay desisyon gikan sa korte. /BDB (BANATNEWS)