2 ka marshall nga positibo sa drugas gitaktak na
CEBU, Philippines — Hingpit nang gitaktak sa serbisyo ang duha ka mga marshall sa kagamhanan sa Dakbayan sa Lapu-Lapu nga nagpositibo sa random drug test nga gihimo niadtong miaging semana.
Si Garry Lao pangulo sa City of Lapu-Lapu Office of Substance Abuse Prevention (CLOSAP) miingon nga ang duha nakadawat sa ilang notice of termination human masuta nga positibo gihapon kini sa pagamit sa ilegal nga drugas.
Ang duha gihatagan na kini ug higayon human nagpositibo sa unang drug test sa miaging tuig ug gipaubos sa drug rehabilitation program.
Matud pa ni Lao nga nagpadayon ang ilang gihimong drug testing nga naglakip sa 190 ka sakop sa City Traffic and Management System (CTMS) nga nasuta nga negatibo sa testing. Lakip sa gipaubos sa kinalit nga drug test mao ang mga sakop sa City Social Welfare and Development Office.
Samtang sa 157 ka mga Person Deprived of Liberty (PDL) tulo usab ang nagpositibo ang resulta ug ilang itugyan ngadto sa korte ang lakang nga pagahimoon ngadto sa mga nag-positibo. —Rowena D. Capistrano/MEL (BANATNEWS)
- Latest
