62 ka bag-ong kaso sa COVID-19 nadugang sa Central Visayas

CEBU, Philippines — Nikabat ngadto sa 62 ang bag-ong kaso sa COVID-19 nga nadugang sa Central Visayas.

Base sa bulletin sa Department of Health (DOH)-7 niadtong Septiyembre 23, 2020 nga 21 sa maong kaso naggikan sa Dakbayan sa Sugbo, usa sa Dakbayan sa Lapu-Lapu, lima sa Dakbayan sa Mandaue, upat sa Probinsiya sa Bohol, 23 sa Probinsiya sa Sugbo ug tulo sa Negros Oriental.

Ang maong gidaghanon nalakip kini sa 1,640 nga kinatibuk-ang kaso sa tibuok rehiyon ug ang recovery sa maong adlaw giingong mas ubos kini tungod kay 39 lang.

Unom sa mga naka-recover naggikan sa Dakbayan sa Sugbo,14 sa Dakbayan sa Lapu-Lapu, duha sa Dakbayan sa Mandaue,17 sa Probinsiya sa Sugbo.

Sa kinatibuk-an nikabat na ngadto sa 17,682 ang recoveries.

Ang cumulative total sa COVID-19 sa Central Visayas nikabat ngadto sa 20, 571 diin 1, 249 ang namatay lakip na ang ulahing duha nga nadugang.

Subay niini, duha ka adlaw na nga zero positive sa bag-ong kaso sa COVID-19 ang Dakbayan sa Talisay.

Kini base sa resulta nga nigawas niadtong Septiyembre 22 niining tuiga.

Sa maong adlaw adunay natala nga lima ka tawo ang naka-recover ug 36 na lang ang active cases karon sa siyudad.

Nikabat ngadto sa 948 ang kinatibuk-ang kaso sa siyudad, 817 ang recoveries ug 95 ang namatay.

Ang katawhan padayong giawhag nga motuman sa mga lagda paglikay sa virus. Gabriel C. Bonjoc/BDB (BANATNEWS)