Palma mohangyo nga magmisa sa sementeriyo atol sa kalag-kalag

CEBU, Philippines — Si Archbishop Jose Palma sa Archdiocese of Cebu mopagawas ug circular letter nga mag-awhag sa Local Government Unit nga tugotan ang mga kaparian ug akolitos nga mohimo og misa diha sa mga sementeriyo atol sa kalag-kalag.

Kini ang gitug-an ni Palma atol sa Santos nga Misa nga gipahigayon niini subay sa ika-98th nga kapistahan ni Santo Tomas De Villanueva nga patron sa Barangay Talaga, Lungsod sa Argao.

Matud ni Palma nga pabor siya sa kagustohan sa mga LGU nga siradohan ang mga sementeriyo panahon sa kalag-kalag pagpugong sa paghugop sa mga tawo nga posibleng makamugna na usab og pagsaka sa kaso sa COVID-19.

Apan mohangyo siya sa mga LGU nga tugotan ang mga pari nga mohimo og misa uban lang sa mga akolitos.

Gibutyag ni Palma nga aduna na hinuon siya’y pagtugot ni Mayor Edgardo Labella human sila nipaabot sa ilang hangyo.

Giawhag ni Palma ang mga magtutuo nga mopadala sa ilang mga pamisa sa mga kalag diha sa ilang mga tagsa-tagsa ka mga parokya.

Subay niini, gikatakdang karong Sabado ipatuman ang hugot nga seguridad sa mga sementeryo sa Dakbayan sa Sugbo.

Si Labella nagkanayon nga sugod sa maong adlaw ipatuman na gyud ang klarong entrance ug exit area sa mga sementeriyo.

Una na nga nimando si Labella nga sirad-an ang tanang sementeriyo gikan sa Oktubre 30 hangtud sa Nobyembre 3, 2020 aron malikayan ang pagbaha sa mga tawo ug malikayan ang pagkuyanap sa COVID-19.

Ang mga sementeriyo abli kini gikan sa alas 6:00 sa buntag hangtud sa alas 6:00 sa gabii.

Dili usab tugotan ang pagpamaligya diha sulod sa sementeriyo ug gipasalig ni Labella hatagan og ayuda nga 25 kilos nga bugas ang maapektohan nga mga mamaligyaay og kandila, buwak ug sepulturero.

Samtang si Mayor Jonas Cortes sa Dakbayan sa Mandaue nimando sa pagsirado sa publiko ug pribadong sementeriyo lakip na ang mga columbarium nga nahimutang sa siyudad karong adlaw sa mga Santos ug kalag.

Si Cortes niluwat sa Executive Order No. 84-B niadtong Septiyembre 21, 2020 nga nagmando  sa pagpasirado sa mga sementeriyo sa siyudad sugod sa Oktubre 29, 2020 hangtud sa Nobiyembre 4, 2020 gawas lang sa paglubong ug cremation diin magpadayon sa maong mga adlaw. —Sanden J. Anadia, Decemay P. Padilla, Romeo T. Limpangog (BANATNEWS)