Medellin isolation center bakante na

CEBU, Philippines — Giisip na karon nga COVID-free ang isolation center sa Lungsod sa Medelin human wala nay nasulod nga pasyente.

Si Dr. Oliver Gimenez maoy nagpahibawo niini sa iyang post sa social media niadtong Domingo nga nag-ingon nga kini maoy labing unang higayon nga walay sulod ang ilang isolation center sukad sa ilang pagsugod sa operasyon sa ikatulong semana niadtong Hulyo 2020.

Sagad sa ilang giatiman mao ang mga mild symptoms lang nga mga pasyente.

Subay sa natala sa maong lungsod niadtong Domingo, Septiyembre 20, adunay 67 nga recovery sa COVID infection, upat ang aktibo ug usa ang namatay niini.

Sa unang advisory sa kagamhanan sa maong lungsod, si Gimenez niingon nga wala sila makatala og bag-ong COVID infection sukad pa niadtong Septiyembre 10, 2020.

Si Gimenez niawhag sa katawhan nga kanunay mosunod sa mga basic health protocols sama sa tukma nga pagsul-ob sa facemask, sakto nga pagpanghunaw gamit ang sabon, tubig ug alcohol, lakip usab ang pagtuman sa social distancing sa tanang panahon sa mga publikong lugar.

Malaumon si Gimenez nga pinaagi sa pagtinabangay sa tanan makab-ot sa lungsod ang COVID-free status. Rowena D. Capistrano/GMR (BANATNEWS)