Ginikanan, duha ka anak nangapaig sa sunog
CEBU, Philippines — Diriyot mahurot og kapaig ang usa ka banay human niulbo ang sunog sa ilang balay diha sa Sitio Walog, Barangay Balabagon lungsod sa Moalboal sayo sa kaadlawon adlaw nga Domingo ug swerte ang 16-anyos nga miyembro sa pamilya ang nakaambak sa ilang bintana.
Nadawat sa kabomberohan ang alarma alas-12 sa kaadlawon nga giingong nasunog ang balay nga gipanag-iya ni Jonathan Masuela. Napawong kini dayon alas-12:19. Apan subo lang nga upat ka miyembro sa pamilya ang wala nakagawas ug sila nakalas nga mao ang magtiayong Jonathan Masuela,38, Rose Masuela,38, ug mga anak nga silang Jethro Masuela ug Dyren Masuela,12 anyos.
Samtang ang nakalingkawas usa ka 16anyos nga anak sa magtiayon nga Masuela.
Si Fire Officer 2 Gibson Hortelano, sa Moalboal Fire Station miingon nga nagpadayon ang ilang gihimong imbestigasyon kun unsay hinungdan sa maong sunog nga gikamatay sa upat ka tawo.
Sumala pa ni Hortelano bisan ang batan-ong nakalingkawas wala gyud kini masayod kun giunsa pagsugod ang kalayo. Wala sab siya masayod dayon kun nakagawas ba dayon ang ilang mga igsuon ug ginikanan. Ang sunog gibana-bana nga modanyos og P15 mil. /IBM (BANATNEWS)
- Latest
