1-meter physical distancing magpabilin

CEBU, Philippines — Gihangop ni Cebu City Mayor Edgardo Labella ang pagsuspenso sa implementasyon sa reduced physical distancing sa public transports human nga gipahibawo ni Presidential Spokesperson Harry Roque atol sa virtual briefing kagahapon nga dili gusto si Pres. Duterte sa maong sugyot.

Ang pagpahibalo sa tubag sa Palasyo gipagawas pila ka adlaw sa wala pa ipatuman sa Department of Transportation(DOTr) ang 0.75 meter distance sa mga pasahero sulod sa Public Utility Vehicles(PUVs) inay nga usa ka metro.

Nagpasalamat si Labella nga naminaw sa katawhan ang Palasyo tungod kay ang World Health Organizations mismo maoy nagtakda sa usa ka metro nga distansiya aron mapugngan ang pagtakod sa Covid-19.

Gitataw ni Labella nga kun i-reduced ang physical distancing sa mga pasaheroan mosaka gyud ang kaso sa Covid-19.

“Ikaduha dinhi sa Sugbo mao may analysis, evaluation sa atong LTFRB nga wa magkuwang atong transportation facility mao bitaw nga wala pa nila tuguti ang traditional PUJ so if that’s is the case there is no compelling reason ngano nga atong pamub-an ang distansya between the passenger of a transportation facility?” ni Labella pa.

Si Labella mipagawas og memorandum nagmando sa Cebu City Transportation Office ug Cebu City Police Office nga ipadayon ang pagpatuman sa one meter physical distancing sa mga pasahero sa tanang public utility vehicles nga nagdagan sa kadalanan sa siyudad.

Kinahanglan lang nga magsuot gyud og facemask ug face shields sulod sa mga pasaheroan ang mga pasahero. Sanden J. Anadia/IBM (BANATNEWS)