LSI dili una paanhion sa siyudad

CEBU, Philippines — Nanawagan si Konsehal Joel Garganera ang pangulo sa Emergency Operations Center sa Dakbayan sa Sugbo ngadto sa mga locally stranded individual kun LSI nga nagtinguha nga mouli sa Western Visayas nga dili lang usa moanhi sa Dakbayan.

Kini tungod kay suma pa ni Garganera nga adunay advisory ang Department of Interior and Local Government DILG nga dili una modawat og mga LSI ang mga lugar sa maong rehiyon.

Ang mga dapit nga mipadayag nga dili una modawat og mga LSI mao ang Bacolod City, Roxas City ug Cadiz.

Sumala pa ni Garganera, ang maong mga lugar misira sa ilang border alang sa mga manguli nga LSIs aron kapugngan ang dugang pagkatap sa coronavirus disease.

Nasayran nga giaprobahan sa Inter Agency Taskforce IATF ang hangyo usab sa Regional Inter Agency Taskforce Western Visayas nga dili una sila modawat og LSI.

Kini sa tuyo nga mahatagan sila og igong panahon sa pag-andam sa ilang mga isolation facilities. /MEL (BANATNEWS)