Kaso sa Cebu City padayong nagkagamay

CEBU, Philippines — Nag-una pa gihapon ang Cebu City sa mga kaso sa novel coronavirus disease kun itandi sa mga silingang mga dagkong siyudad dinhi sa Sugbo, apan dako kaayo ang recovery rate nga natala sa siyudad sukad nga gipahugtan ang pagpatuman sa mga health protocols.

Sa 9,688 total cases sa COVID-19 sa siyudad anaa nalang sa 351 ang aktibong kaso niini sumala pa sa datos sa Department of Health Central Visayas niadtong Domingo.

Nianang adlawa, ang siyudad nakatala og 16 ka mga bag-ong kaso apan

 ang recoveries sa Cebu City niabot na og 8,679 ug naa sa 658 ang total deaths.

Samtang ang siyudad sa Lapu-Lapu dunay 2,231 total cases diin 210 niini ang active cases ug niadtong Domingo ang siyudad mitala og usa ka bag-ong kaso.

Ang ilang recoveries niabot na og 1,930 ug ang total deaths naa sa 91.

Ang siyudad sa Mandaue duna say 2,287 total cases sa COVID-19 diin 356 niini ang active cases, hinuon ang ilang recoveries niabot na og 1, 843 ug 88 ang total deaths.

Samtang tulo ka bag-ong kaso sa Covid-19 ang nadugang sa Dakbayan sa Talisay base sa resulta nga nigawas niadtong Septiyembre 5 ning tuiga.

Ang mga nagpositibo nagagikan sa barangay Maghaway nga nag edad og 75 anyos samtang duha gikan sa barangay Biasong nga nag edad og 19 anyos ug 26 anyos. Pulos sila na expose sa mga una nang nagpositibo sa maong sakit.

Sa pagkakaron, adunay 51 ka aktibong kaso ang siyudad  samtang 743 na ang naayo ug samtang 87 ang namatay.

Padayon gihapon nanawagan ang kagamhanan nga padayon sundon ang health protocols aron mapugngan pa gyud ang pagkatap sa virus.

Ang Talisay gipaubos na sa Modified General Community Quarantine (MGCQ) apan padayon nga estrikto sa health protocols.

Ang Probinsya sa Sugbo aduna say 861 ka aktibong kaso human adunay nadugang nga 31 ka bag-ong kaso, samtang ang Bohol aduna na karoy 158 ka active cases, Negros Oriental dunay 40 active cases  ug ang Siquijor Covid-free gihapon.

Sa samang adlaw Septiyembre 6, gipahibalo sa DOH-7  nga ang Central Visayas aduna nay 19,332 total cases sa COVID-19;  ang 1, 976 niini nalang maoy aktibo samtang 16,217 na ang nangaayo ug 1,139 ang total deaths.

Sa pikas bahin, gipaspasan sa Dakbayan sa Mandaue ang pagtukod sa duha ka isolation facilities niini diha sa kanhi Cebu North Bus Terminal sa Barangay Subangdaku ug Norkis Park  sa  dalan  Plaridel sa Barangay Looc.

Si  Atty. John Eddu Ibañez, executive secretary ni Mayor Jonas Cortes kinahanglan ang maong mga pasilidad aron di na gamiton sa maong katuyoan ang City  Central School nunot sa taliabot ang pagbukas og balik sa klase. –Gabriel Bonjoc, Romeo T.   Limpangog/IBM (BANATNEWS)