Kapolisan sa Rehiyon 6, 8 namauli na
CEBU, Philippines — Namauli na sa tagsatagsa nila ka lugar ang kapolisan sa Police Regional Office 6 ug PRO-8 human sa dul-an duha ka buwan nilang pagtabang sa Dakbayan sa Sugbo batok sa coronavirus disease.
Usa ka send-off ceremony ang gipahigayon kagahapon sa buntag nga gitambungan nila ni Cebu City Mayor Edgardo Labella ug PRO-7 regional director, Police Brigadier General Albert Ignatius Ferro, sa Cebu City Sports Center.
Sa PRO-6, 44 ka polis ang makabalik na samtang siyam ang mahabilin kinsa nagpositibo sa COVID-19 ug pito ang close contacts niini. Sa PRO-8, 49 ang makauli, upat ang mahabilin nga nagpositibo sa COVID-19 ug tulo ang close contact.
Sumala pa ni Ferro nga ilang giseguro nga luwas ang mga polis nga manguli sa ilang tagsa-tagsa ka pamilya ug iya usab gipaneguro nga hugot ang ilang suporta nga ihatag sa mga nahabilin.
Dugang ni Ferro nga ang kapolisan gikan sa ubang rehiyon ila na nga gipapauli tungod kay aduna pa usab kini silay tahas sa ilang tagsa-tagsa ka lugar ug andam usab siya mosuporta kung manginahanglan ang maong mga rehiyon sa tabang sa PRO-7.
Si Ferro mapasalamaton sa pagtabang sa maong mga polis batok COVID-19.
Gihulagway sa PRO-7 ingon man sa kagamhanan sa Dakbayan sa Sugbo nga mga bag-ong bayani ang kapolisan sa PRO-6 ug 8 sa ilang pagtabang batok sa COVID-19.
Si Labella daku ang pasalamat sa maong mga polis sanglit daku ang ilang natampo aron ang kaso sa COVID-19 sa siyudad mokunhod gumikan sab sa ilang wala’y kakapoy nga pagbadlong ug pagpahinumdum sa mga tawo nga mosunod gyud sa health protocols.
Ang PRO-7 nihatag og pasidungog sa maong mga polis diin si Ferro nagpasalamat sa serbisyo nga ilang gihatag sa mga Sugbuanon.
Naabot ang 107 ka polis gikan sa PRO-6 ug 8 niadtong Hunyo 18 diin sa maong panahon taas ang kaso sa COVID-19 sa siyudad.
“Kamong mga Waraynons, mga Ilonggos have contributed a lot to protecting your fellow Visayan community, fellow Filipino here in Central Visayas. Today we are celebrating the National Heroes Day so kita tanan most especially you, PRO-6 and PRO-8, you are our modern heroes,” sigun ni Ferro.
Gipasalig sa kapolisan sa Central Visayas nga atimanon nila ang nahabilin nga mga polis ug kun makarekober na ipadala nila kini balik sa ilang tagsa-tagsa ka yunit. Decemay P. Padilla/GMR (BANATNEWS)
- Latest
