Dugang parking area sa palibot sa Pasil Fish Market giplanohan

CEBU, Philippines — Nagplano ang Market Administrator sa Dakbayan sa Sugbo nga magbutang og dugang parking area diha sa palibot sa Pasil Fish Market.

Kini human namatikdan nga mihuot ang dagan sa trapiko human gibuksan na og balik ang maong merkado sa Pasil.  Nasayran niadtong tungang gabii sa adlaw nga Sabado gibuksan pagbalik sa publiko ang merkado.

Nakita sa market authorities ang panginahanglan sa dugang parking area aron dili maghuot sa mga sakyanan ang maong dapit tungod sa pagdaghan sa mga mangomprahay og isda.

Ang Market Administrator nga si Irvin Cabales, nibutyag nga hapsay ra hinoon ang pagbukas pagbalik sa Pasil diin maoy dako nga wet market sa mga pagkaon dinhi sa syudad. Subay niini makig-alayon si Cabales sa barangay ug sa silingan nga barangay aron makahatag sila ug dugang luna alang sa ka-parkingan  sa mga mamalitay diha sa Pasil.  Kahinumduman gisirad-an ang merkado sa Pasil human daghan sa mga vendors niini ug mga residente sa maong dapit ang nataptan sa coronavirus disease. /MEL (BANATNEWS)